Reseı men Qazaqstan oıynyna 9 myń jankúıer jınalady

ASTANA. 31 naýryz. Endi eki saǵattan keıin fýtboldan Reseı men Qazaqstan quramalary arasynda joldastyq kezdesý bastalady. Atalǵan oıyndy stadıonnan 9 myńnan astam jankúıer tamashalamaq. Bul týraly sport-express.ru habarlady. Oıynnyń Hımkı qalasynda ótetini belgili. Astana ýaqyty boıynsha saǵat 23:00-de bastalatyn oıyndy «Habar» telearnasy tikeleı efırde kórsetedi. Reseı quramasynyń bas jattyqtyrýshysy Fabıo Kapello búgingi kezdesýge erekshe mán berip otyr. «Bul match oıynshylarymyzdyń shama-sharqyn anyqtaýǵa múmkindik beredi. Bizdi alda 2016 jylǵy Eýropa chempıonatynyń irikteý týrnıri aıasyndaǵy sheshýshi oıyndar kútip tur. Sondaı mańyzdy kezdesýlerdiń aldynda daıyndyqtarymyzdy pysyqtaý úshin búgingi oıynǵa erekshe mán berip otyrmyz», – dedi Kapelo myrza. О́z kezeginde, Qazaqstan quramasynyń bas jattyqtyrýshysy Iýrıı Krasnojan aldaǵy kezdesýdi tájirıbe almasý jáne óz oıyn órnegimizdi jetildirý úshin berilgen múmkindik dep baǵalady. «Eki memlekettiń dostyq qatynasta ekeni belgili. Sondaı-aq, eki komandanyń da bolashaǵy jarqyn dep bilemin. Reseı 2018 jyldan zor úmit kútedi. Búgingi oıynǵa baılanysty qarsylastarymyz aldaǵy matchtarda alańǵa shyǵatyn quramasyn jasaqtamaq. Al bizder 2016 jylǵy Eýropa chempıonatynyń irikteý oıyndaryna qatyspaǵan keıbir fýtbolshylarymyzǵa múmkindik bermekpiz», – dedi Iýrıı Krasnojan. Elaman Qońyr. Derek: sport-express.ru. Sýret: eurosport.ru.