Fýtboldan Qazaqstan quramasy Reseımen teń oınady

ASTANA. 1 sáýir. Búgin, naýryzdyń 31-nen sáýirdiń 1-ne qaraǵan túni fýtboldan Qazaqstan ulttyq quramasy Máskeý túbindegi Hımkı qalasynda  Reseıdiń bas komandasymen joldastyq kezdesý ótkizip, 0:0 esebimen teń oınady. Bul týraly egemen.kz habarlady. Oıyn ortasha deńgeıde ótti. Alańda jan berip, jan alysqan tartys kórinbedi. Áıtkenmen, bizdiń qurama oıynshylary munyń aldyndaǵy Islandııamen kezdesýge qaraǵanda, sóz joq, bul joly birshama táýir oıyn kórsetti. Ásirese, Baýyrjan Islamhan men Ulan Qonysbaev belsendilikterimen erekshe kózge tústi. Osy jerde aıta ketetin jáıt, budan úsh kún buryn biz Baýyrjannyń Islandııamen ótken oıyndaǵy jankeshtiligine de tánti bolǵan edik. Match barysynda qaqpashy Stanıslav Pokatılov erekshe sheberligimen kózge tústi. Ol osy joly ulttyq qurama sapynda starttyq quramda alańǵa alǵash ret shyǵyp otyrǵanyna qaramastan, birneshe ret sheber oıyn órnegin kórsetip, qarsylastardyń aıtarlyqtaı qaýipti soqqylaryna tosqaýyl bola bildi. Budan bólek, Georgıı Jýkov ta birinshi ret ulttyq quramanyń namysyn qorǵaǵanyn aıta ketýimiz kerek. Kezdesýdiń birinshi bóliginde alań ıeleriniń esep ashatyn biraz múmkindikteri boldy. Sonyń birinde aıyp soqqysyn oryndaǵan Aleksandr Samedovtiń aıaǵynan ushqan dopty qaqpa mańdaıshasyna tıip, keri qaıtty. Al ekinshi taımda bizdiń oıynshylar belsendilik kórsetti. Olar oıyn barysynda úsh birdeı múmkindikti múlt jiberip aldy. Aldymen Islamhan qaqpashymen betpe-bet shyǵyp, dopty qıys tepse, Toqtar Jańǵylyshbaı eki márte bos qaqpany kózdeı alǵan joq. Osy rette komandada shabýylǵa núkte qoıa alatyn oıynshynyń jetispeıtini anyq baıqalady. Jalpy, match kezinde Reseıdiń sonshalyqty ótkir shabýyldaryn kóre almadyq. Alań ıeleriniń bas bapkeri Fabıo Kapello sondyqtan alty oıynshysyn almastyryp, oıyndy qyzdyrýǵa kúsh salyp baqty. Biraq kózdegen maqsatyna jete almady. Al qazaqstandyqtardyń bas jattyqtyrýshysy Iýrıı Krasnojan tórt oıynshyny ǵana tyńnan qosty. Aınalyp kelgende, eki jaqtan da erekshe bir gol soǵatyn múmkindikter bola qoımaǵan kezdesý aqyry esep ashylmaǵan kúıi aıaqtaldy. Elaman Qońyr. Derek: egemen.kz. Sýret: khabar.kz.   Reseı – Qazaqstan 0:0 31 naýryz. Hımkı. «Hımkı-Arena» stadıony. 9 500 kórermen. Tóreshi: Alekseı Kýlbakov (Belarýs). Reseı: Iýrıı Lodygın, Georgıı Shennıkov (Elmır Nabıýllın 71), Vasılıı Berezýskıı (Roman Zobnın 22), Alekseı Kozlov, Ivan Novoselsev, Rýslan Kambolov, Dmıtrıı Torbınskıı (Denıs Davydov 63), Aleksandr Rıazansev (Magomed Ozdoev 46), Aleksandr Samedov, Artem Dzıýba (Igor Portnıagın 46), Maksım Kanýnnıkov (Dmıtrıı Efremov 80). Qazaqstan: Stanıslav Pokatılov, Mark Gýrman, Sergeı Malyı, Samat Smaqov, Dmıtrıı Shomko, Konstantın Engel, Baýyrjan Islamhan, Iýrıı Logvınenko, Ulan Qonysbaev (Jaqyp Qojamberdi 77), Georgıı Jýkov (Abzal Beısebekov 86), Baýyrjan Jolshıev (Toqtar Jańǵylyshbaı 43, Alekseı Shetkın 82). Eskertý: Baýyrjan Jolshıev 17.