Elbasynyń «О́mir ótkelderi» atty suhbat kitaby jaryq kórdi

ASTANA. 1 shilde. Búgin Astanada Elbasy Nursultan Nazarbaevtyń «О́mir ótkelderi» atty suhbat kitabynyń tusaýkeser rásimi ótti. Kitapqa belgili jýrnalıst, «Egemen Qazaqstan» respýblıkalyq gazeti» aksıonerlik qoǵamynyń prezıdenti Saýytbek Abdrahmanovqa sońǵy jyldary bergen suhbattary toptastyrylǵan. Saltanatty sharaǵa Memlekettik hatshy Gúlshara Ábdiqalyqova, Parlament depýtattary jáne zııaly qaýym ókilderi qatysty. Bul týraly egemen.kz habarlady. Jalpy, kitapta Elbasy óziniń shyqqan teginen bastap, balalyq shaǵy, mekteptegi kezi, Dneprodzerjınskidegi jastyq jyldary, Temirtaýdaǵy qurysh quıǵan sátteri týraly áńgimeleıdi. Týyndy 16 taraýdan, 570 betten turady. Ony taıaýda elimizdiń barlyq kitaphanalarynan oqýǵa bolady. Jańa týyndy týraly Memlekettik hatshy: «Táýelsiz elimizdiń Tuńǵysh Prezıdenti, álemdik deńgeıde birtýar tulǵa, Elbasy Nursultan Ábishuly Nazarbaevtyń tarıhı ómiri jaıynda jazylǵan shyǵarmalar qatary mazmuny tereń jańa týyndymen tolyǵyp otyr. Elbasymyzdyń ómirbaıany alǵash ret óziniń «Ádilettiń aq joly» atty kitabynda baıandalǵanyn bilemiz. Qazaqstan Prezıdentiniń sodan keıingi kitaptarynyń barlyǵy eldiń strategııalyq damý baǵytynyń jekelegen tarmaqtaryna arnalǵany málim. Sondyqtan «О́mir ótkelderi» Memleket basshysynyń táýelsizdik alǵan 1991 jyldan keıin ózi týraly áńgimelegen ekinshi kitaby deýge bolady. Shyǵarmanyń qundylyǵy týraly aıtar bolsam, Elbasy men suhbat alýshy arasyndaǵy ádebı shynaıy áńgimeniń órbýi, egemendik shejiresine qatysty buryn-sońdy estimegen tyń derekterdiń usynylýy, «Ushqan uıa ulaǵaty» atty taraýmen bastalyp, «Nurly jolǵa» ulasýy sııaqty ómirbaıandyq suhbattar tarıhı oqıǵalarmen sabaqtastyryla ret-retimen berilýi, sondaı-aq, ózara dıalog barysyndaǵy ıntellektýaldylyq pen qazaqtyń shuraıly tili oqyrmandy ózine tartatyn erekshe tustarynyń qataryna jatady», – dedi. О́z kezeginde shara moderatory, Elbasy qyzmeti týraly birqatar kitaptardyń avtory Mahmýd Qasymbekov Prezıdenttiń jańa kitabynyń erekshelikterin aıtyp berdi. Sonymen qatar, belgili tulǵalar – Myrzataı Joldasbekov, Kenjeǵalı Saǵadıev, Tóleýtaı Súleımenov jáne Aleksandr Tarakov kitap týraly óz pikirlerin bildirdi. Jaqsybaı Samrat. Derek: egemen.kz. Sýret: baq.kz.