Otandyq jańa messendjer

Memlekettik tildi damytý qory Prezıdent janyndaǵy Ortalyq kommýnıkasııalar qyzmetinde iPhone jáne iPad tutynýshylary úshin qoljetimdi «Aıtys» atty tuńǵysh qazaqstandyq messendjerdiń tusaýkeserin ótkizdi. Atalǵan jańa otandyq jobany tanystyrǵan Memlekettik tildi damytý qorynyń dırektory Azat Shaýeev iTys (Aıtys) mobıldik qosymshasy qoldanýshylarǵa memlekettik tilde tolyqqandy hat-habar almasýǵa múmkindik berip qana qoımaı, sondaı-aq, álemniń ár qıyryndaǵy barsha qazaqstandyqtardy biriktirýdi kózdeıtindigin jetkizdi.  Bul iTys ónimi Elbasy Nursultan Nazarbaevtyń elimizdi qarqyndy damytýdyń basty baǵdary retinde aıqyndaǵan ınno­vasııalyq jobalarynyń qa­ta­­­­ry­na jatady, dep atap ótken A.Shaýeev  alǵash ret «Aıtys» qazaq­standyq messendjeriniń tusaýkeseri ótken jyldyń qarashasynda ótkizilgendigin eske saldy. Bıylǵy jylǵy tusaý­keserde atalǵan jobanyń jetildirilip, birshama utymdy tustary bar eken­digin atap ótti. iTys Qazaqstanda, ásirese, jastar arasynda erekshe tanymal baılanys túrine aınaldy. Elimizdegi iTys-ty qoldanýshylar kún saıyn úsh mıllıonnan astam habarlama jiberip, mýltımedııalyq faıldar almasyp otyrady, dedi ol. Sondaı-aq, qor dırektory­ atal­mysh messendjer barsha qazaq­­stan­dyq­tardyń, sondaı-aq, shetel­dikterdiń de qoldaýyna ıe bolyp, oǵan qatysty oń pikirler aıtylyp jatqandyǵyn tilge tıek etti. Sonymen qatar,  joba jetekshisi Dáýit Shaıhıslamov birneshe aı­dyń ishinde bul messendjerdi uıaly telefondaryna júktep alǵan tuty­nýshylar sany 150 000-nan asty, olardyń qatarynda tek Qazaqstan turǵyndary ǵana emes, Reseı, AQSh, Qytaı, Koreıa, Túrkııa, Fransııa jáne Japonııa elderiniń azamattary bar, dep atap kórsetti. Onyń aıtýynsha, baǵdarlamanyń birqatar utymdy da tıimdi tustary  barshylyq: munda jeke habarlamalardyń qupııa­ly­ly­ǵyn saqtaýǵa múmkindik beretin avtomatty óshirý fýnksııasy bar, ulttyq naqyshtaǵy stıkerler men smaılıkter de oryndy tańdalǵan, ınterfeısti de qazaq, orys jáne aǵylshyn tilderinde qoldanýǵa bolady. Jáne de eń tıimdi tusy – tegin paıdalaný múmkindigi. Aqparat úshin qosa ketsek, iTys – barshamyz biletin Whatsapp-tyń qa­zaq­sha balamasy. Ol tuńǵysh qazaq­standyq mamandar ázirlep shyǵarǵan, jedel habar almasý múmkindigin be­re­tin arnaıy mobıldik qosymsha. «Aıtys» komandasy alǵashqy qazaq­standyq messendjerdi jetildirý jumystaryn toqtaýsyz júrgizýde. Joba ázirleýshileri taıaý aralyqta iTys servısiniń bazasynda tegin dybystyq qońyraýlar, qazaq tiliniń avtotúzetýshisi, grafıkalyq redaktor servısterin usynyp, ulttyq naqyshtaǵy jańa stıkerler men anımasııalar túrin qospaqshy. iPhone jáne iPad qurylǵylaryna ornatylatyn messendjerdiń qazaqsha klavıatýrasy da qolaıly, orys jáne aǵylshyn áripterine kózderi úırengen tutynýshylar endi qazaq álipbıin de erkin paıdalana alady. Bul mindetterdi joǵary deńgeıde oryndap, kópshilik kóńilinen shyǵý úshin  jetildirý jumystaryna qazaq­standyq daryndy sýretshiler, dızaınerler jáne tehnıkalyq mamandar jumyldyrylmaq. Elmıra MÁTIBAEVA, «Egemen Qazaqstan».