Patrık Klıýıvert bas jattyqtyrýshy boldy

ASTANA. 5 naýryz. Fýtboldan Nıderlandy quramasynyń burynǵy oıynshysy, áıgili shabýylshy Patrık Klıýıvert Kıýrasao ulttyq komandasynyń bas jattyqtyrýshysy bolyp taǵaıyndaldy. Bul týraly eurosport.ru habarlady. Klıýıvert úshin bul bas jattyqtyrýshy retindegi alǵashqy tájirıbe. Buǵan deıin ol Nıderlandy ulttyq quramasynyń bas bapkeri Lýı van Galdyń kómekshisi qyzmetin atqaryp keldi. Kıýrasao fýtbolynyń basshylary búgin Patrık Klıýıvertti fýtbolshylarmen resmı túrde tanystyrmaq. Jalpy, bul el FIFA reıtınginde 209 komandanyń arasynda 160-orynda keledi. Karıb teńizinde ornalasqan aral memlekettiń Klıýıvertke qoıyp otyrǵan basty talaby 2018 jylǵy álem chempıonatyna joldama alý. Jýyrda Kıýrasao Monserrata quramasymen oınaıdy. Eger bul oıynda jeńiske jeter bolsa, Klıýıverttiń shákirtteri kelesi tartysta Kýbamen kúsh synaspaq. 38 jastaǵy nıderlandylyq maman jattyqtyrýshylyq qyzmetin 2010 jyly bastady. ««Barselonany» jattyqtyrsam deımin. Ázirge bul arman ǵana. Sol armannyń júzege asqanyn qalaımyn. Úmitim zor. Eger «Real Madrıdten» de usynys túsip jatsa, qarsy bolmas edim», deıdi dańqty fýtbolshy. Patrık Klıýıverttiń fýtbolshy retindegi juldyzdy shaǵy 1998-2004 jyldary «Barselona» sapynda ótkenin aıta keteıik. Elaman Qońyr. Derek: eurosport.ru. Sýret: armfootball.com