UIаBAEV UMYTYLMASYN

Redaksııaǵa hat Men “Egemen Qazaqstannyń” eń qart oqyrmandarynyń birimin. Redaksııaǵa joldap otyrǵan osy ma­­­qalamda qalamger zamandasym Qur­manǵalı Uıabaev týraly sóz qoz­ǵa­maqpyn. Ol Uly Otan soǵysynan keıin “Sosıalıstik Qazaqstanda” eńbek etken azamat edi. Atap aıt­qan­da, Qurekeń 1950 jyldan 1965 jylǵa deıin munda ocherkıst, bólim meńge­rý­shisi, basylymnyń Pavlodar, Aq­t­óbe oblystary boıynsha menshikti tilshisi qyzmetterin atqardy. “So­sıalıstik Qazaqstanǵa” kelgenshe ol aqyn bolyp qalyptasqan-tyn. Bul talant ıesi týraly Sábıt Mu­qa­nov Jazýshylar odaǵynyń kezekti se­zin­de: “...alda kóp úmit kúttiretin ta­lantty qazaq aqyndarynyń biri” dep Qurmanǵalı Uıabaevty atap, azamat aqyn retinde baǵa bergeni bar. Odan soń jazýshy О́tebaı Qanahın, aqyn Syrbaı Máýlenov jáne basqalary Q.Uıabaevtyń shyǵarma­shy­lyǵyna qurmetpen qaraǵanyn óz basym jaq­sy bilemin. О́ıtkeni, Qu­rekeń lırı­kalyq óleńderdiń sheberi bolǵan. Ol epık aqyn retinde “Sa­ǵat”, “Taǵdyr týraly sóz”, “Jer men adam” atty poemalar jazyp, 14 ki­tap­tyń avtory atanǵan jan edi. She­ber aýdarmashy retinde Pýshkın, Mı­skevıch, Anto­kolskıı, Tvardov­s­kıı óleńderin qazaq tilinde sóıletken. Amal ne, osy áıgili aqyn, sheber tárjimeshi umytylyp, ataýsyz qalyp keledi. Azamattyń esimi ózi týyp-ósken óńirdegi bir mektepke de be­ril­gen joq. Mereıtoılary tek aýdan­daǵy aýyldyq jıyn kóleminde ǵana atalyp júr. Bıylǵy datasy aýyzǵa da alynbaı otyr. Redaksııaǵa hat jazýdaǵy maqsatym – Qazaqstan Ja­zýshylar odaǵy men Almaty oblys­tyq ákimdigi joǵarydaǵy jáıtterden habardar bolsa deımin. Habardar bolyp qana qoımaı, ol ómirge kelgen aýdandaǵy bir bilim uıasyna onyń atyn bergizýge muryn­dyq bolsa oń bolar edi. Budan aqyn­nyń bir kezdegi eńbek etken orny – burynǵy “So­sıalıstik Qazaqstan” (qazirgi “Ege­men Qazaqstan”) gazeti de syrt qalmas dep oılaımyn. Úsenbaı TASTANBEKOV, Qazaqstannyń qurmetti jýrnalısi. Almaty oblysy, Qarasaı aýdany, Qaskeleń qalasy.