9-10 sáýirde «Jas Otan» jastar qanatynyń kezekten tys III sezi ótedi. Bul týraly keshe «Jas Otan» jastar qanatynyń 2020 jylǵa deıingi «Jastar – Otanǵa!» baǵdarlamasyn ázirleý boıynsha uıymdastyrylǵan qorytyndy jınalys barysynda belgili boldy.
Bul baǵdarlama «Jas Otan» jastar qanatynyń kezekten tys III sezinde qabyldanatyn bolady. Ol uıymnyń ári qaraıǵy is-qımyly úshin ıdeologııalyq baǵdar bolmaq, sondaı-aq, «Qazaqstan-2050» Strategııasyn iske asyrýda tabysqa qol jetkizýge baǵyttalǵan.
Otyrys barysynda «Jas Otan» jastar qanatynyń atqarýshy hatshysy Nurlan Sydyqov sóz alyp, atalǵan baǵdarlamada 4 negizgi baǵytqa aıryqsha nazar aýdarylǵanyna, bul qujattyń negizinde «Nurly Jol» baǵdarlamasy men «Nur Otan» partııasynyń Saıası doktrınasynda kórsetilgen qundylyqtar jatqanyna toqtaldy. «Jańa baǵdarlamada ár jas qazaqstandyq tabysynyń negizi retinde 4 negizgi baǵyt kórinis tapqan. Biz patrıotızm, jeke qabiletti damytý, bilim men eńbekke qushtarlyq, kásibı órleý men otbasylyq qundylyqtar sııaqty basymdyqtarǵa erekshe nazar aýdardyq», dedi N. Sydyqov. Ol, sondaı-aq, sezd jumysyna Qazaqstannyń aımaqtarynan 2 myńǵa tarta azamat qatysatynyn, olar «Jas Otan» jastar qanatynyń belsendileri, jastar uıymdarynyń músheleri, shyǵarmashyl jastar, jas ǵalymdar, sportshylar, máslıhat depýtattary, jumysshylar, aýyl jastary ekenin atap ótti.
Búgingi kúnge deıin atalǵan baǵdarlama jobasy elimiz boıynsha jastardyń arasynda jan-jaqty talqylanǵan. Mundaı talqylaýlar «Erkin pikir» pikirtalas klýby otyrysynyń sheńberinde óńirlik konferensııalarda, «Jas Otan» jastar qanatynyń 1700 bastaýysh bóliminde ótken. Bul baǵdarlamany ázirleý barysynda sarapshylar men respýblıkanyń barlyq óńirindegi jastardyń usynystary eskerilgen eken.
Láıla EDILQYZY,
«Egemen Qazaqstan».
Sýretti túsirgen,
Erlan OMAROV.
