Microsoft korporasııasynyń negizin qalaýshy, álemdegi eń baı adamnyń biri Pol Allen ózi qaıtys bolǵannan keıin bar baılyǵyn qaıyrymdylyq maqsatqa jumsaý jóninde ósıetin rásimdepti. 57 jasar mıllıarderdiń baılyǵy – 13,5 mıllıard dollar. Ol qazir aıtarlyqtaı qatty aýrýǵa ushyraǵan kórinedi.
Kez kelgenge qoldy bolmaı, jıǵan baılyǵy kembaǵaldarǵa tııýin kúni buryn oılastyrǵan sabazdy aıtsańshy! Talaılar baılyǵyn ana dúnıege birge alyp ketetindeı kórinedi ǵoı.
Rahımovqa eshkim tıispeıdi
Bashqurtstan Respýblıkasynyń prezıdenti 76 jastaǵy Murtaza Rahımov óz ótinishi boıynsha qyzmetinen ketti. Osyǵan baılanysty biraz áńgime de bolǵan. Tipti, ony qylmysy bardaı etkender de tabylǵan. Biraq onyń ótinishin qabyldaǵan respýblıka quryltaıy (parlamenti) oǵan eshkimniń tıispeýine kepildik berý jóninde sheshim qabyldapty. Al aı saıynǵy zeınetaqysynyń mólsherin 750 myń rýbl kóleminde belgilegen. Bul 25 myń dollarǵa jaqyn.
Prezıdentti sottamaq
Gaagadaǵy halyqaralyq sot Sýdandaǵy Darfýr provınsııasynda jergilikti turǵyndarǵa qarsy genosıdtik sharalar júrgizgeni úshin Sýdan prezıdenti Omar ál-Bashırdi tutqynǵa alý jóninde ekinshi ret order jazyp otyr. Prokýror oǵan 2,5 mıllıon halyqty lagerde qamap ustaǵany jóninde aıyp taqqan. Ál-Bashır sotqa ózi bara qoımas. Al halyqaralyq sot sáti túskende ony tutqynǵa alýy ábden múmkin. Serbııanyń burynǵy prezıdenti S.Mıloshevıchtiń sol sot túrmesinde qaıtys bolǵanyn jurt umytqan joq.
Chaves pen Hrıstos
Venesýela prezıdenti Ýgo Chaves taǵy bir minez kórsetti. Eldegi katolıkter jetekshisi kardınal Horhe Ýrosa prezıdent Chaves elde “Kýbalyq kommýnızm” ornatpaq dep syn aıtyp edi, prezıdent sol sátte katolık shirkeýi yqpalyn shekteýdi qolǵa aldy. Eń aldymen, ishki ister mınıstrligine Vatıkanmen qarym-qatynasty qaıta qaraý jóninde nusqaý berdi. Hrıstospen sóılesip kelgendeı, “Papa Benedıkt XVI Hrıstostyń elshisi emes”, dep kesip aıtty. Al bul – katolısızmniń basty qaǵıdasynyń biri. Venesýela halqynyń 95 paıyzy katolısızmdi ustanady.
Bıdaı qymbattaǵan
Sońǵy eki aptada álemdik saýdada bıdaıdyń baǵasy 30 paıyzǵa qymbattapty. Sarapshylardyń baǵamdaýynsha, bıyl bıdaı ónimi aıtarlyqtaı kem bolmaq. Ol Reseıdegi jáne Batys Eýropadaǵy qurǵaqshylyqqa, sondaı-aq Kanada, Qara teńiz aımaǵyndaǵy biraz elderdegi nóserli jaýynǵa baılanysty kórinedi. Bul jaǵdaı osy daqyldy satatyn elderge qosymsha tabys ákelse kerek.
Ysyrapqor mınıstr
Grekııanyń aýyr ekonomıkalyq daǵdarysqa ushyraǵany týraly álem shýlap jatyr. Qaryzdary shash etekten. Búkil Eýropa kómek qolyn sozdy. Mundaı kúıge bul el qalaı dýshar bolǵan? Jaqynda sonyń bir syry ashyldy – sheneýnikter qarjyny ońdy-soldy shashypty. Aıtalyq, ádilet mınıstri bolǵan Sotırıos Hatsıgakıs úkimet múshesi bolǵan kezde 20 mıllıon eýro qarjyny qalta telefonǵa jumsapty. Jumsaǵanda, 30 telefondy týystaryna, dostaryna taratyp bergen jáne sóıleskenderi úshin aqsha tólep otyrǵan. Bul jaı belgili bolǵan soń, sheteldegiler grekterge nege kómektesemiz dep shý kóterip jatqan kórinedi.
Reseıde fashıster kóp
Resmı málimetterge qaraǵanda, búkil dúnıe júzinde 120 myń ásireultshyldar, ıaǵnı jańa fashıster bar bolsa, sonyń 50-60 myńy Reseıde eken. Muny adam quqy jónindegi Máskeý bıýrosy anyqtapty. Ásirese, ásireultshyldar Sankt-Peterbýrg (15 myń) pen Máskeýde (2,5 myń) kóbirek shoǵyrlanǵan kórinedi. Ásireultshyldar basqa halyqtardyń ókilderine, ásirese, kavkazdyqtar men ortaazııalyqtarǵa qarsy áreketterge ázir turady eken. Jalpy, mundaı kóńil-kúı búkil elde beleń alǵandaı. “Reseı – tek orystar úshin!” degen urandy reseılikterdiń 53 paıyzy maquldasa kerek.
О́zgeni de qurmette
Ulybrıtanııa parlamenti musylmandardyń dástúrli kıim kıisine, naqtyraq aıtqanda, páránjimen júrýge tyıym salý jónindegi usynysty qabyldamady. Immıgrasııa jónindegi mınıstr Demıan Grınniń pikirinshe, bul eldiń dástúrinde kimniń kóshede qalaı júrýin belgileıtindeı ádet joq, bul tózimdilik qaǵıdasyna qaıshy jáne basqany da qurmetteýge tıis. Budan buryn fransýzdar páránjige tyıym salǵan. Mundaǵylar da soǵan eliktegen syńaıly, biraq olardyń degeni bolmady.
Ázirlegen Mamadııar JAQYP.
