Bir úı – bir el
Úıdiń berekesi qabyrǵasynyń qııýymen emes, teńiniń jııýymen, otbasyndaǵy syılastyqpen, tatýlyqpen kiredi.Nursultan NAZARBAEV.
О́lkeniń, atyraptyń, eldiń tiregi emes pe báıterekteı jaıqalǵan áýletter. Aqjaıyq aýdanyndaǵy Saqypkereı men Kúlán Jantýrınderdiń shańyraǵy solardyń biri bolyp tabylady. 1961 jyly otaý tikken olardyń baı eńbek joly da, tálimdi turmysy da naǵyz ónege mektebi dersiń.
Eńbek demekshi, búginde marqum Saqypkereı aǵanyń da, qazir úsh nemere, alty jıen, bir shóbereniń baǵyna bólengen Kúlán ananyń da basyn qaıyrmaǵan sharýa joq. Aýdan ortalyǵy – Chapaevtyń irgesindegi Jaıyq aýylynda sonaý jyldary sharýashylyqtaǵy mal bordaqylaýdyń bel ortasynda boldy. Kúlán ana aýdandyq Keńestiń depýtattyǵyna da saılanyp, ortaq múdde oraıynda qyrýar is tyndyrdy. Beý, jyldar-aı deısiń. Uly Otan soǵysy kezinde, 1944 jyly opat bolyp, Ternopol oblysy, Verbısha selosy mańyna jerlengen ákesi Hamza sekildi Jeńis sarbazdarynyń rýhyn aıalap, alty ul-qyzyn, búginde olardan órbigen urpaqty eljandylyqqa, eńbekqorlyqqa, elgezektikke, jaýapkershilikke baýlyǵan onyń áýletin aqjaıyqtyqtar maqtan tutady. Mundaı otbasylar ámanda taǵzymnyń tórinde, qurmettiń órinde.
Bala tárbıesinde óziniń anasy, 105 jas jasap, baqılyqqa attanǵan, aýdannyń shejiresin jatqa soqqan Qapıza Ahmetovanyń orny zor bolǵanyn Kúlán ana maqtanyshpen aıtady. О́zinen burynǵylardyń eńbekti amanattaǵanyn da urpaǵynyń qulaǵyna quıyp otyrady. Eńbek dese eleńdep turatyn, búginde el aǵasy jasyna taıaǵan uly Álipqalıdyń arqasynda 20 shaqty iri qara, 40 shaqty ýaq jandyq, qylquıryq ta ósirip, sonyń ıgiligin kórip otyrǵany da sondyqtan. Mekteptegi sabaqtan qalt etkende kishkentaılar mal baǵymyna jaǵalasyp júredi. Shirkin, sondaǵy altyn besik aýyldyń sýretin aıt!
– Adamǵa kerek nárse kóp. Biraq, balapandar – balaǵa jetetin ne bar deıdi, – Kúlán Jantýrına.
Bul sózge ne alyp-qosarsyń.
Bolat ESQALIEV.Batys Qazaqstan oblysy.
Aqjaıyq aýdany.
Chapaev aýyly.
Qazaqstanym – qarashańyraǵym
Áýlettiń ıesi Aflıat Dıamýrshaev Qarmaqshy aýdanyndaǵy III Internasıonal aýylyndaǵy «BAAR» úıirmesine jetekshilik etedi. Aıta ketý kerek, Aflıattyń ákesi Telman «Qarmaqshy aýdanynyń qurmetti azamaty» bolǵan. Dıamýrshaevtardyń shańyraǵynda tórt bala bar. Tuńǵyshy Daflıat bıyl Qyzylorda qalasyndaǵy Qorqyt ata atyndaǵy memlekettik ýnıversıtetti támamdaıdy. Shehnaz «Bolashaq» ýnıversıtetiniń III kýrs stýdenti, Islam Shymkent qalasyndaǵy respýblıkalyq áskerı mektep-ınternatta oqıdy. Nursultan 4 jasta. Aflıat pen Gokchak Dıamýrshaevtar – Qazaqstannyń ósip-órkendeýin jan-tánimen qalaıtyn, elimizdiń árbir jetistigine shyn qýanatyn adamdar. О́ıtkeni, olar ózderiniń taǵdyryn Qazaqstannan bólip qaraı almaıdy.
Erjan BAITILES,
«Egemen Qazaqstan».
Qyzylorda oblysy.
