GÝMANITARLYQ JÁRDEM BERILEDI

Keshe Premer-Mınıstrdiń birinshi orynbasary О́mirzaq Shókeevtiń tóraǵalyǵymen Qyrǵyzstanǵa gýmanıtarlyq kómek kórsetý maqsatynda keńes ótti. Oǵan qos memlekettiń birqatar úkimet músheleri men vedomstvolar ókilderi qatysty. Otyrysta О́.Shókeev Qyrǵyzstanǵa arnalǵan daǵdarysty eńserý josparyn ázirleý jumystary 26 shildege deıin aıaqtalatynyn aıta kele, daǵdarysty eńserý baǵdarlamasyn ázirleýge jaýapty Qyrǵyzstan delegasııasy kelip otyrǵanyn tilge tıek etti. Sondaı-aq ol Qazaqstan tarapynan búginde daǵdarysqa qarsy jospardyń aldyn ala jobasy men ony júzege asyrý is-sharalar jospary ázirlengenin de nazardan tys qaldyrmady. Bul rette birinshi Vıse-premer Qyrǵyzstanǵa arnalǵan daǵdarysqa qarsy jospardyń jobasyn áli de pysyqtaýdy Ekonomıkalyq damý jáne saýda vıse-mınıstri Qýandyq Bıshimbaevqa júktedi. Qyrǵyz eli úkimet múshelerimen ótken bul basqosýda О́.Shókeev: “Úkimet basshysy Qyrǵyzstanǵa gýmanıtarlyq kómek kórsetý maqsatynda eki qaýlyǵa qol qoıdy. Endi ózgesi Tótenshe jaǵdaılar mınıstrligine baılanysty. Atap aıtsaq, jedel túrde Qyrǵyzstanǵa kómir men qurylys materıaldary jetkizilýi tıis”, – dedi. Jıynnan keıin elimizdiń Tótenshe jaǵdaılar mınıstri Vladımır Bojko jýrnalısterge bergen suhbatynda qyrǵyz tarapynyń ótinishi boıynsha qos qaýly sheńberinde atalǵan memleketke qurylys materıaldary jetkiziletinin jáne Shubarkól kómiriniń qyrǵyz elektr stansasyna jol tartýy josparlanyp otyrǵanyn aıtty. Mınıstrdiń sózine qaraǵanda, osy aptanyń sońyna qaraı gýmanıtarlyq kómektiń alǵashqy vagondary jóneltilmek. Ábdirahman QYDYRBEK.