Elızabet Tursynbaeva álem chempıonatyna qatysýda

ASTANA. 5 naýryz. Estonııada mánerlep syrǵanaýdan jasóspirimder arasynda álem chempıonaty ótýde. Atalǵan dodaǵa elimizdiń atynan Elızabet Tursynbaeva qatysýda. Bul týraly egemen.kz habarlady. Estonııanyń astanasy Tallınde ótip jatqan jarysta bizdiń qyz ázirge jetinshi orynda keledi. Qysqa baǵdarlama boıynsha Elızabet 55,95 upaı jınady. Bul synda reseılik Evgenııa Medvedeva 68,48 upaımen kósh bastady. Ekinshi orynǵa Jenıanyń otandasy Serafımy Sahanovıch (63,09 upaı) jaıǵassa, úzdik úshtikti Japonııa sportshysy Vakaba Hıgýchı (61,27 upaı) túıindep tur. Saıysqa barlyǵy 43 sportshy qatysyp, sonyń 24-i erkin baǵdarlama boıynsha óner kórsetýge múmkindik aldy. Atalǵan saıys 6 naýryz kúni ótedi. Tallındegi tartysta el namysyn jalǵyz Elızabet Tursynbaeva qorǵap jatqanyn aıta keteıik. Mánerlep syrǵanaýshy qyzymyz buǵan deıin birneshe halyqaralyq jarystarda olja salyp, el namysyn abyroımen qorǵap júr. Tipti jasóspirimder arasyndaǵy gran-prı jarysynyń eki kezeńinde júldege iligip, álemdik mamandardan joǵary baǵa aldy. Búginde qazaq qyzy Kanadada belgili jattyqtyrýshy Braıan Orserden tálim alady. Kım Iýna (Vankýver-2010) jáne Iýdzýrý Hanıý (Sochı-2014) syndy eki birdeı Olımpıada chempıonyn daıyndaǵan kanadalyq maman bizdiń qyzdyń da bolashaǵyna úmitpen qaraıdy. О́tken aqpan aıynda 15 jasqa tolǵan Tursynbaeva osy jyldyń kúzinen bastap eresekter arasyndaǵy jarystarǵa qatysýǵa múmkindik aldy. Elaman Qońyr. Derek: egemen.kz. Sýret: sk-sport.kz.