Sportty damytý basty nazarda

Memlekettik hatshy Gúlshara Ábdiqalyqova Halyqaralyq dzıýdo federasııasynyń prezıdenti Marıýs Vızerdi qabyldady. Bul kezdesý ústimizdegi jyly Astanada ótetin dzıýdodan álem chempıonaty aıasynda oryn alyp otyr. Memlekettik hatshy álem chempıonatyn ótkizýdi belgileý kezinde elimizge tańdaý jasaǵany úshin Halyqaralyq dzıýdo federasııasy basshysyna rızashylyǵyn bildirdi. Jáne Qazaqstanda sporttyń barlyq túrine qyzyǵýshylyq artyp kele jatqandyǵy da ataldy. Sonyń jarqyn dáleli retinde jaqynda paıdalanýǵa berilgen Muz saraıyn ataýǵa bolady. «Elimizde jyl saıyn jańa sport nysandary paıdalanýǵa berilýde. Onyń ústine kelesi jyl Olımpıada ótetin jyl bolǵan­dyqtan, sporttyń barlyq túrinen daıyndyq bastalyp ta ketti. Jalpy, Qazaqstanda kóptegen sport túrlerinen jarystar ótkizilip keledi», – dedi Memlekettik hatshy. Qazirgi tańda dzıýdo elimizdegi eń tanymal sport túrleriniń biri bolsa, onymen 80 myńnan astam qazaqstandyq turaqty túrde aınalysady. El Prezıdenti Nursultan Nazarbaev dene tárbıesine, buqaralyq sportqa jáne bul saladaǵy joǵary jetistikterge aıryqsha mán beretinin ataı kele, Gúlshara Ábdiqalyqova búginde halyqaralyq talaptarǵa saı sporttyq nysandar boı kóterýde jáne álemdik deńgeıdegi sporttyq sharalar ótkizilýde ekendigin atap ótti. Halyqaralyq dzıýdo federa­sııasynyń prezıdenti M.Vızer dodaǵa álemniń kóptegen elderinen sportshylar kelip qatyssa, osyndaı sport túrleriniń jankúıerleri Qazaqstanǵa nazar salatyny atap ótildi. Meımannyń aıtýynsha, qazir elimizde mektep oqýshylary men balalarǵa arnalǵan «mektep­tegi dzıýdo» jobasy ázirlenýde. Atal­ǵan jobany qarjylandyrý Halyqaralyq dzıýdo federasııasy tarapynan júrgizilmek. Retine qaraı, táýelsizdikten bergi kezeńde el dzıýdoshylary Olımpıada oıyndarynda 1 kúmis medal alsa, álem chempıonattarynda – 1 altyn, 2 kúmis jáne 3 qola medal, Azııa oıyndarynda – 32 medal, onyń ishinde 1 altyn, 10 kúmis jáne 21 qola alǵan. Asqar TURAPBAIULY, «Egemen Qazaqstan».