Jańa ekonomıkalyq saıasatqa kóshý jospary maquldandy

Senbi kúni Premer-Mınıstr Kárim Másimov Úkimettiń selektorlyq otyrysyn ótkizdi. Otyrysta jańa ekonomıkalyq saıasatqa kóshý jaǵdaıyndaǵy eldiń áleýmettik-ekonomıkalyq damýy máseleleri qaraldy, dep habarlady Premer-Mınıstrdiń baspasóz qyzmeti. Atap aıtqanda, Orta merzimdi perspektıvada ekonomıkalyq ósimdi qamtamasyz etýge baǵyt­talǵan sharalar jospary talqy­landy, sondaı-aq, Úkimet pen Ult­tyq banktiń ınflıasııalyq targetteýge kóshý jaǵdaıyndaǵy shuǵyl sharalary maquldandy. Ulttyq ekonomıka mınıstri E.Dosaev atap ótkendeı, Shuǵyl sharalar jospary bes baǵyttan turady. Jospar tutastaı ekonomıkany da ári onyń jekelegen salalaryn da qorǵaýǵa baǵyttalǵan. Josparǵa sáıkes, Úkimet pen Ulttyq banktiń qyzmeti eko­no­mıkanyń naqty sektoryn qol­daýǵa, jeke ınvestısııa tartýdy yntalandyrýǵa, jumyspen qam­týǵa, jańa jumys oryndaryn qurýǵa, qarjylyq turaqtylyqty ustap turýǵa, Ulttyq qor qara­jatyn tıimdi paıdalanýǵa, son­daı-aq, respýblıkalyq bıýdjet teńgerimdigin qamtamasyz etýge baǵyttalatyn bolady. Mınıstr «qarjy resýrstary shekteýli bolyp otyrǵan jaǵdaı­da qarajat basym baǵyttarǵa qaıta úlestirilip, memlekettik jáne salalyq baǵdarlamalardy qarjylandyrýdy ońtaılandyrý jalǵasyn tabady jáne aıaq­talady», dep atap ótti. Sonymen qatar, E.Dosaev «Shuǵyl sharalar jospary áleýmettik mańyzdy taýarlarǵa baǵanyń ósýine jol bermeý, jeke tulǵalar men Turǵyn úı qurylys jınaq banki salymshylarynyń merzimdi depozıtteri boıynsha ótem­aqy tóleý mehanızmimen to­lyq­tyrylatynyn» atap kórsetti. Josparǵa sondaı-aq, ónerkásip kásiporyndaryn, turǵyndardyń áleýmettik az qamtylǵan toptaryn qoldaý jáne jumyspen qamtý boıynsha jedel sharalardy qamtıtyn óńirlik blok ta qosylǵan. «Shuǵyl sıpattaǵy basqa da amaldardy, sonyń ishinde, jal­py alǵanda ekonomıkanyń naqty sek­toryndaǵy jaǵdaıdy turaq­tandyrýǵa baǵyttalǵan syrtqy saýdany retteýdiń tarıf­tik emes ádis­terin, ishki naryqty qor­­­ǵaý amal­daryn iske asyrý qaras­tyrylyp otyr», dep atap ótti mınıstr. Sonymen qatar, Úkimet múshe­leri áleýmettik mańyzdy azyq-túlik taýarlary baǵasynyń kóteri­l­ýine jol bermeýdi qarastyratyn keshendi sharalardy talqylady. Olar atalǵan taýarlardyń mańyz­dylyǵyn anyqtap, josyqsyz báse­ke­les­terdiń jolyn kesip, monopo­lııaǵa qarsy baqylaý sharalaryn qa­rastyrmaq. Oǵan qosa, Ulttyq ekonomıka mınıstri Erbolat Dosaev aımaq basshylaryna tu­raq­tylyq qorlary arqyly ta­ýar ıntervensııasyn júrgizý jáne tu­raqty túrde aýylsharýashy­lyq jár­meńkesin ótkizip turý kerek­tigin aıtty. «Odan basqa, áleýmettik ma­ńyz­dy taýarlar baǵasyna kúnde­likti monıtorıng júrgizilip, jyl­dyń aıaǵyna deıin bazarlarda áleýmettik mańyzdy taýarlarǵa taldaý jasalady. Baǵa básekesiniń damýyna kedergiler anyqtalatyn bolady», dep túıindedi E.Dosaev. Otyrys sońynda Premer-Mınıstr múddeli memlekettik organdar basshylaryna birqatar tapsyrmalar júktedi.