Murtqa ókpelep júrgende...

Ata-babalarymyz qara sózdiń qaımaǵyn qalqyp, astarlap sóılep, keıingi urpaqqa mura etip ulaǵatty sózder qaldyrǵan. Mysaly, «murtqa ókpelep júrgende saqal shyqty» degen sózdiń astary teńizdeı tereńde jatyr. Bir qıyndyqty aýyrsynyp júrgen, odan da aýyr qıyndyqqa tap bolǵan kezde aıtylǵan. Munyń dálelin alystan izdemeı-aq ózimizden tabýǵa bolady. О́tken jyly elektr qýatynyń bir KVt-na 14 teńge 56 tıynnan tólegende tutynýshylar qatty qınalyp júrdi. Ásirese, tek qana zeınetaqyǵa qarap otyrǵan zeınetkerler men jumyssyzdar, bir úıde bir adam ǵana jumys isteıtin az qamtylǵan otbasylary qatty qınaldy. Kúndelikti qajettiliktiń ózine jumsaǵanda aıdan-aıǵa zeınetaqysy ápil-tápil jetip júrgen zeınetker bıyl elektr qýatynyń ár KVt-nyń quny 19 teńge 57 tıyn bolyp, birden 5 teńge 1 tıynǵa ósip shyǵa kelgende tóbesine qazandaı qara tas qulaǵandaı eseńgirep qaldy. Onyń ústine dúkenderdegi zattardyń, azyq-túliktiń baǵalaryn da kásipkerler sharyqtatyp turǵanda, mynaý aýyr soqqy boldy. О́tken jylǵy 14 teńge 56 tıynnan azaıtýdan úmittenip júrgende toqtyń baǵasy sharyqtap shyǵa keldi. Bul «toqal eshki múıiz suraımyn dep júrip qulaǵynan aıyrylyptynyń» keri boldy. Bir tańǵalarlyǵy, monopolııa­ny retteý agenttigi buǵan qalaı jol berip otyr, álde bul mekeme eshkimdi moıyndamaıtyn, halyqtyń jaǵdaıyn oılamaıtyn aıaǵy aspannan salbyrap túsken mekeme me? Tym bolmaǵanda zeınetkerlerge, az qamtamasyz etilgen otbasylaryna, múmkindigi shekteýli jandarǵa jeńildik jasamaı ma? Mundaı jandar endi ne tamaqtan tapshylyq kórýi kerek, ne jaryqsyz otyrý kerek qoı. «Murtqa ókpelep júrgende saqal shyqty» degen osy. Joǵary jaqtaǵylar muny eskeretin shyǵar dep oılaımyz. Maǵzumbek MAShAIYQULY, Qazaqstan Jýrnalıster odaǵynyń múshesi, Ulytaý aýdanynyń qurmetti azamaty. Qaraǵandy oblysy.