TAŃDAǴAN DÁRIGERIMIZ SENIMDI AQTADY – deıdi Shyńǵyrlaý aýdanynyń turǵyny Sátbaı Qalabaev

Búgingi ulttyq densaýlyq saqtaý júıesindegi ózgerister men jańa talaptarǵa sáıkes kez-kelgen respýblıka azamaty ózi qalaǵan, ózi tańdaǵan dárigerge qaralyp emdele alady. Oǵan eshqandaı shek qoıylmaıdy. Ob­lys­tyń soltústik jaq bó­liginde or­nalasqan Shyń­ǵyrlaý aýda­ny­nyń turǵyny Sátbaı Qala­baev­tyń “Egemen Qazaq­stan­nyń” Oral qalasyndaǵy tilshiler qosy­nyna kelgendegi basty aıtaıyn degen oıy osy eken. Ol kisi aman­­dyq-saýlyq surasqannan keıin sóz jelisin bylaısha sabaqtady: – Balamyzǵa shuǵyl aıaq astynan ota jasatý kerek boldy. Sodan soń úı ishimizben onyń taǵ­dyryn qaı aýrýhanaǵa, qaı hırýrgke senip tapsyrýǵa bolady degen máseleni talqyǵa saldyq. El ishinen suraı kele, izdestire kele Kaztalov aýdanyna qarasty Jalpaqtal aýyldyq aýrý­ha­nasynda talaı adamdy ajaldan arashalap, dertterine daýa taýyp ber­gen Esengeldi Rabaev degen hırýrgtyń bar ekenin estidik. Shyńǵyrlaý oblystyń sol­tústiginde qonys tepse, Jalpaqtal ońtústiginde ornalasqan. Oǵan barý úshin eń aldymen 250 kıllometr qashyq­tyqtaǵy oblys ortalyǵy Oralǵa kelip, sodan soń taǵy da 300 kıllometr jol júrý qajet boldy. Osyndaı jol azabyn keship jer túbindegi Jalpaqtalǵa da jettik-aý, aqy­ry. Bizdiń alystan kelgenimizden habardar bolyp qalsa kerek, Esengeldi tez, ári kezeksiz qabyldady. Kóp ke­shik­tirmeı otany da ózi jasap tastady. Qatelespegen ekenbiz. Oıǵa alǵan maqsatymyz oryndalyp, ota óte sátti shyqty. Muny biz birinshiden Esengeldiniń shıpaly qoly men kásibı sheberliginiń arqasy dep bilemiz. Ol balamyzdy operasııalyq bloktan palataǵa aýystyrǵannan keıin de, tikeleı óz baqylaýyna aldy. Kóp keshikpeı balamyz shalǵaıdaǵy aýyldyq aýrýhanadan qulan-taza jazylyp shyqty. Sondaı-aq medbıkeler G.Mahmetova men J.Sadyqovaǵa da rızashylyǵymyz sheksiz. Álbette adamdy senim aldamaıdy ǵoı. Bizdi de shalǵaı aýyldaǵy qarapaıym hırýrg Esen­gel­di Rabaevqa degen senimimiz al­damaǵanyna óte qýanyshtymyz. Onyń talaı adamdy dertinen qulan-taza aıyqtyryp júrgen bilikti maman-hırýrg ekenine kózimiz odan saıyn jete tústi. Mine, osy qýanyshymyzdy elimizdiń bas gazeti “Egemenge” habarlaǵandy jón kórip ózińizge kelip otyrmyz,– dep aıaqtady óz áńgimesin Sátbaı Qalabaev. Temir QUSAIYN.