Hokkeı. «Barys» jańa maýsymdy jeńilispen bastady

ASTANA. 26 tamyz. Keshe Astananyń «Barysy» Qurlyqtyq hokkeı lıgasynyń jańa maýsymyndaǵy alǵashqy kezdesýin ótkizdi. О́z aıdynynda Magnıtogorskiniń «Metallýrg» komandasyn qabyldaǵan elordalyqtar 1:2 esebimen ese jiberdi. Bul týraly egemen.kz habarlady. Oıynnyń alǵashqy kezeńi teń jaǵdaıda órbidi. Qarsylastar alma-kezek shabýyldap, birneshe qaýipti soqqylar jasap kórdi. Alaıda, sheshýshi sátte múlt ketip jatty. Al 17-mınýtta «Barystyń» qarymta shabýyly óz nátıjesin berip, aıdyn ıeleri esepte alǵa shyqty. Shaıbanyń avtory – Konstantın Rýdenko. Gol soǵylǵan sátte eki komanda da 4 hokkeıshimen óner kórsetip jatqanyn aıta keteıik. Úziliske deıin bul esep ózgergen joq. Ekinshi kezeńde qonaqtar basym boldy. Ony osy kezeńde qaqpaǵa baǵyttalǵan soqqy sanyna qarap-aq ańǵarýǵa bolady. Atap aıtqanda, bul kezeńde «Barys» bes-aq márte qarsylastar qaqpasyn nysanaǵa alsa, «Metallýrg» oıynshylary 20 soqqymen jaýap qaıtardy. Abyroı bolǵanda, olardyń bireýi de dittegen jerden tabylmady. Oǵan qaqpashymyz Iаn Lasonyń sheberligi sebep bolǵanyn aıta ketýimiz kerek. Nátıjesinde oıynnyń ekinshi bóliginde esep ózgerissiz qaldy. Úshinshi kezeńde Magnıtogorskiden kelgen oıynshylar degenderine jetip, bizdiń qaqpaǵa eki birdeı shaıba engizdi. Aldymen, 45-mınýtta Krıs Lı mergendigimen kózge tússe, arada 9 mınýt ýaqyt ótkende Voıtek Volskı esepti eseledi. Oıyn sońyna deıin tablodaǵy nátıje ózgermeı, «Mettallýrg» 2:1 esebimen jeńiske jetti. Match barysyndaǵy keıbir statıstıkalyq kórsetkishterge nazar aýdaraıyq. Qaqpaǵa jasalǵan soqqy jóninen qonaqtar eki ese basym boldy. 60 mınýttyń ishinde «Barys» 22 soqqy jasasa, «Metallýrg» 41 márte Lasonyń ıeligin nysanaǵa alǵan. Qos komandanyń da aıyp ýaqyty 4 mınýtty qurady. «Barys» Qurlyqtyq hokkeı lıgasyndaǵy kelesi kezdesýin 27 tamyzda taǵy da óz aıdynynda ótkizedi. Erlan Saǵymbaev jattyqtyratyn jasaq ol oıynda Ýfanyń «Salavat Iýlaev» komandasymen kúsh synasady. Elaman Qońyr. Derek: egemen.kz. Sýret: hcbarys.kz.