Shaǵyn jáne orta bıznesti qoldaý qarqyny saqtalady

Prezıdent janyndaǵy Ortalyq kommýnıkasııalar qyzmetinde «Damý» kásipkerlikti damytý qory» AQ basshysy men qyzmetkerleri baspasóz máslıhatyn ótkizdi.  Onda buqaraǵa osy kúnderi oryn alyp otyrǵan teńgeniń erkin baǵamyna oraı aıtarlyqtaı kúrdeli ahýaldyń bolmaıtynyna  baılanysty birqatar málimetter tarqatylyp aıtyldy. Bul rette qordyń basqarma tóraǵasynyń orynbasary Dáýlet Ábilqaıyrov shaǵyn jáne orta bıznes sýbektilerin qarjylandyrý tek qana teńgemen júzege asyrylyp, sondyqtan teńge baǵamynyń túzetilýi «Damý» qory zaemshylaryna keri áser etpeıtinin atap ótti. Degenmen,  ol sheteldik valıýtamen berilgen nesıelerdi sýbsıdııalaýǵa ruqsat etiletindigin aıta kele, qazirgi ýaqytta «Damý» qory baǵdarlamasy boıynsha jalpy somasy  53 mlrd. teńgeni quraıtyn  27 kompanııa úshin shetel valıýtasyndaǵy nesıelerin sýbsı­dııalaý  júzege asyp jatqan­dyǵyn jetkizdi. Onyń ishinde valıýtalyq túsimi bar 11 kásiporyn «Bıznestiń jol kartasy-2020»  bıznesti qoldaý men damytýdyń biryńǵaı baǵdarlamasynyń «Va­lıýta­lyq táýekelderdi tómen­detý» atty úshinshi baǵyty boıynsha qaıta qarjylandyryldy. Bul rette  «Damý» qory qaryz alýshylarynyń arasyndaǵy shetel­diń valıýta nesıeleriniń úle­si az ǵana jáne bar bolǵany 3, 85% quraı­tyndyǵy atalyp ótildi. Sonymen qatar, ol   atalǵan qordyń 228 mln. dollarǵa Azııa damý bankinen úshinshi transhty tartý josparymen tanystyryp,  buǵan qosa shaǵyn jáne orta bıznesti nesıelendirý teńgeleı iske asyrylatyndyǵy jóninde  keńinen áńgimeledi. D.Ábilqaıyrovtyń aıtýynsha, «Damý» qorynyń valıýtalyq qateri ekinshi deńgeıli bankterdiń AQSh dollaryn teńgege aıyrbastaý boıynsha valıýtalyq-paıyzdyq aıyrbas operasııasy jolymen hedjırlenedi. Úshinshi transh aǵymdaǵy  jyldyń sońyna deıin túsedi dep kútilýde. Olar ShOB sýbektileri úshin aınalym qarajaty men negizgi qordy satyp alý­ǵa baǵyttalady, dedi ol. Son­daı-aq, ADB baǵdarlamasy sha­ǵyn jáne orta bıznestiń qyzmet sala­laryn keńinen qamtýdy qamta­ma­syz etetin salalyq shekteý­ler­diń bol­maıtyndyǵyn qaras­tyra­tyndyǵyn aıta kele, qosymsha úsh myń jumys orny qurylady dep josparlanyp otyrǵandyǵyna toqtaldy. Jáne de  Azııa damý bankindegi qarjylaı baǵdarlamaǵa 1300-den astam  qaryz alýshyny qatystyrý qarastyrylýda. Bul oraıda teńge baǵamyn túzetý kásipkerlik ahýalǵa salqynyn tıgize qoımaıtynyn, keleshekte kásipkerler jumysynyń jandana túsý yqtımaldyǵy atalyp ótildi.  «Damý» qory shaǵyn jáne orta bızneske qoldaý kórsetý qarqynyn tómendetpeıdi,  kerisinshe, olarǵa kómek qolyn sozýda bizdiń taraptan oń jaǵdaılar jasalatyn bolady, dedi. Onyń aıtýynsha, «Bıznestiń jol kartasy-2020» bıznesti qoldaý men damytýdyń biryńǵaı baǵdarlamasynyń nátıjesi boıynsha  5 536 qaryz alýshy 1 143 mlrd.teńge kóleminde nesıe alǵan.  Aǵymdaǵy jyly sýbsıdııalaý quralyna qoljetimdilik aıtarlyqtaı ósip,  mono jáne shaǵyn qalalar men aýyldyq eldi meken kásipkerleri úshin 10% mólsherindegi sýbsıdııalaý salalyq shekteýsiz berilýde, dedi.  Sondaı-aq, ol  óńdeý ónerkásibiniń basym salalaryndaǵy kásipkerler úshin sýbsıdııalaý mólsheri 10%-ǵa deıin kóterilse,  ekonomıkanyń ózge de basym sektorlary úshin sýbsıdııa­laý mólsheri 7%-ǵa teń ekendigin kóldeneń tartty. Elmıra MÁTIBAEVA, «Egemen Qazaqstan».