Qostanaılyqtar salqyn sý úshin 58 mıllıon teńge qaryz

QOSTANAI. 2 shilde. Qostanaı qalasynyń turǵyndary jyl basynan beri salqyn sý men kanalızasııany paıdalanǵany úshin 6 mıllıon teńge qaryz. Al jalpy «Qostanaısý» kásipornyna ótken jyldardyń jınaqtalǵan qaryzy 58 mıllıon teńgeni quraıdy. Bul týraly egemen.kz tilshisi habarlady. Kommýnaldyq qyzmet qyzmetkerleri qaryzdan qoryqpaǵandarmen kúrestiń «jańa» túrin tapty. Olar endi sý aqysyn tólemegenderge krandy jabady. Mundaı amaldy jıyrma shaqty páterge qoldanyp ta úlgerdi. «Qostanaı sý» kommýnaldyq kásipornynyń ınjeneri Batyrbek Saýytov: «Eger páter ıesiniń    sýǵa qaryzy 10 myń teńgeden asyp ketse, biz amalsyzdan eń sońǵy sharaǵa baryp, sýmen qamtamasyz etýdi doǵarýǵa májbúrmiz. Qazirge deıin 23 páterge salqyn sýdyń kranyn japtyq», dedi.  Kommýnaldyq kásiporyn qyzmetkerleri salqyn sýdan ajyratqan páterlerdiń qaryzy 600 myńnan asyp ketken eken.  Osyndaı shara qoldanǵannan keıin  páterler qaryzy  kóleminiń ekiden úshi qysqarypty.  Biraq kásiporyn qyzmetkerleri málimdegendeı, mundaı sharaǵa barǵanymen  turǵyndardyń  sýǵa degen qaryzy báribir ósip otyr. Názıra Járimbetova. Derek, sýret: alau.kz