ASTANA. 26 tamyz. Bas prokýror Ashat Daýylbaev aldaǵy kúnderi ótetin Shanhaı yntymaqtastyq uıymyna múshe memleketterdiń bas prokýrorlarynyń 13-shi jınalysy jáne Táýelsiz Memleketter Dostastyǵy elderiniń bas prokýrorlary Úılestirý keńesiniń (TMD BPÚK) 25-shi jınalysy aıasynda birqatar jumys kezdesýlerin ótkizdi. Bul týraly Bas prokýratýranyń baspasóz qyzmeti habarlady.
Atap aıtqanda, elimizdiń basty qadaǵalaý vedomstvosynyń basshysy Mońǵolııa bas prokýrory Enh-Amgalan Magvannorovpen, Úndistan bas prokýrory Mýkýl Rohatgımen, Aýǵanstan Islam Respýblıkasynyń bas prokýrory Nýr Djalalmen, Belarýs Respýblıkasynyń bas prokýrory Aleksandr Konıýkpen, О́zbekstan Respýblıkasynyń bas prokýrory Ihtııor Abdýllaevpen jáne Qytaı Halyq Respýblıkasynyń bas prokýrory Sao Szıanmınmen kezdesti.
О́tkizilgen kezdesýlerdiń basty taqyryby ShYU jáne TMD BPÚK aıasyndaǵy yntymaqtastyq máseleleri boldy. Taraptar ózara quqyqtyq kómek, prokýrorlyq qyzmettiń baǵyttary boıynsha tájirıbe almasýdy jalǵastyrý, qaýipsizdiktiń ártúrli transulttyq qaterlerine tosqaýyl qoıý salasyndaǵy zańnamanyń oryndalýyn qamtamasyz etý jónindegi utymdy sharalardy qabyldaý máseleleri boıynsha halyqaralyq yntymaqtastyqtyń tıimdiligin arttyrýǵa erekshe nazar aýdardy.
Sonymen qatar, terrorızmmen jáne ekstremızmmen, esirtkiniń jáne qarýdyń zańsyz aınalymymen, transshekaralyq qylmystylyqtyń ózge de túrlerimen, sondaı-aq zańsyz kóshi-qonmen kúres problemalaryn qozǵaıtyn aldaǵy kúnderi ótetin memleketaralyq organdardyń forýmdarynyń kún tártibindegi máseleler qozǵaldy.
Taraptar sondaı-aq Shanhaı yntymaqtastyq Uıymyna múshe memleketterdegi dástúrli jáne jańa qaýip-qaterler men qaýipsizdikke tónetin qaterlerge tosqaýyl qoıýdy quqyqtyq retteýdi birkelki etý jáne ulttyq zańnamany jetildirý máselelerin talqylady.
Shanhaı yntymaqtastyq Uıymy turaqty áreket etýshi úkimetaralyq uıym. Ol 2001 jylǵy 15 maýsymda Qazaqstan Respýblıkasy, Qytaı Halyq Respýblıkasy, Qyrǵyz Respýblıkasy, Reseı Federasııasy, Tájikstan Respýblıkasy jáne О́zbekstan Respýblıkasynyń qatysýmen qurylǵan.
Qazirgi ýaqytta Aýǵanstan, Belarýs, Úndistan, Iran, Mońǵolııa jáne Pákstan ShYU baqylaýshylary, Túrkııa men Shrı-Lanka – suhbattasý boıynsha seriktes mártebesine ıe. 2015 jylǵy 10 shildede Úndistan men Pákstanǵa múshe-memleket retinde ShYU-ǵa qosylý týraly, al Ázerbaıjan Respýblıkasy, Armenııa Respýblıkasy, Kambodja Koroldigi jáne Nepal Federatıvtik Demokratııalyq Respýblıkasyna suhbattasý boıynsha seriktes mártebesin berý týraly sheshim qabyldandy.
Aıdar О́risbaev.
Derek, sýret: Bas prokýratýranyń baspasóz qyzmeti.
