Fýtbol. «Astana» Chempıondar lıgasynyń toptyq kezeńine shyqty (vıdeo)

ASTANA. 27 tamyz. Búgin «Astana» ÝEFA Chempıondar lıgasy irikteý týrnıriniń pleı-off básekesi sheńberinde qarymta kezdesýin ótkizdi. Syrt alańda Kıprdiń APOEL komandasymen bolǵan oıyn 1:1 esebimen teń aıaqtaldy. Apta buryn oınalǵan Astanadaǵy alǵashqy oıynda elordalyqtar 1:0 esebimen jeńiske jetken bolatyn. Eki matchtyń qorytyndysy boıynsha «Astana» Chempıondar lıgasynyń toptyq kezeńine joldama aldy. Mundaı nátıje Qazaqstan fýtbolynyń tarıhynda tuńǵysh ret tirkelip otyr. Bul týraly egemen.kz habarlady. Nıkosııadaǵy kezdesý tolyǵymen alań ıeleriniń basymdyǵymen ótti. Birinshi taımda birneshe ret qaýipti shabýyldar uıymdastyrǵanymen APOEL oıynshylary esep ashatyn múmkindikterdi múlt jiberdi. Al «Astana» qarymta shabýyldarǵa ǵana ıek artyp, negizinen qorǵanysta kóp kúsh jumsady. Ekinshi taım taǵy da apoeldikterdiń basymdyǵymen bastaldy. Tolassyz shabýyldardyń arqasynda alań ıeleri 60-mınýtta esep ashty. Aıyp soqqysyn óte sátti oryndaǵan Semır Shtılıch tamasha goldyń avtory atandy. Gol salǵannan keıin APOEL-diń qarqyny kúsheıip, shabýyldaýdy údete tústi. Oıyndaǵy ózgeristerdi eskergen «Astananyń» bas jattyqtyrýshysy Stanımır Stoılov 68-mınýtta alǵashqy qadamyn jasap, Tańat Nóserbaevtyń ornyna Jýnıor Kabanangany shyǵardy. Aıqastyń 84-mınýtynda bizdiń komanda degenine jetip, tarazy basyn teńestirdi. Kezekti qarymta shabýyldardyń birinde Baýyrjan Jolshıev qaptaldan aıyp alańyna pas shyǵardy. Áriptesi asyrǵan dopty sátti paıdalanǵan Nemanıa Maksımovıch Qazaqstan fýtboly tarıhyndaǵy eń mańyzdy goldardyń birin soqty. Sebebi, oıyn sońyna deıin esep ózgerissiz qalyp, Maksımovıchtiń doby «Astanany» týrnırdiń toptyq kezeńine alyp shyqty. Matchtaǵy keıbir statıstıkalyq kórsetkishterge nazar aýdaraıyq. Qaqpaǵa baǵyttalǵan soqqy jóninen APOEL alda boldy (10 – 8). Onyń ishinde týra jasalǵan soqqylar – 6 – 6. Al dopqa ıelik etý kórsetkishi boıynsha alań ıeleri aıtarlyqtaı basymdyq tanytty (66% – 34%). Oıyn barysynda «Astananyń» qaqpashysy Nenad Erıchtiń belsendi bolǵanyn erekshe atap ótken jón. Sondaı-aq, Baýyrjan Jolshıev pen Georgıı Jýkov ta sheberlikterimen kózge tústi. ÝEFA Chempıondar lıgasy. Irikteý týrnıriniń pleı-off básekesi. APOEL (Nıkosııa, Kıpr) – «Astana» (Astana, Qazaqstan) 1:1 (0:0), 0:1 26 tamyz. Nıkosııa. GSP stadıony. 23 000 kórermen. Tóreshiler: Martın Atkınson, Stıven Chaıld, Stıýart Bard (bári de – Anglııa). APOEL: Boı Vaterman, Marıý Serjıý, Inıakı Astıs, Marıos Antonıades (Mateýsh Pentkovskıı 86), Karlaý (Joao Gılerme 83), Semır Shtılıch, Konstantınos Makrıdıs (Konstantınos Haralambıdes 55), Nýný Moraısh, Tomas Sebastıan De Vınsentı, Lýıs Leal, Vander. «Astana»: Nenad Erıch, Marın Anıchıch, Branko Ilıch, Evgenıı Postnıkov, Dmıtrıı Shomko, Roher Kanıas, Foksı Ketevoama (Alekseı Shetkın 90+3), Nemanıa Maksımovıch, Tańat Nóserbaev (Jýnıor Kabananga 68), Georgıı Jýkov (Abzal Beısebekov 89), Baýyrjan Jolshıev. Goldar: Semır Shtılıch 60 – Nemanıa Maksımovıch 84. Eskertýler: Tomas Sebastıan De Vınsentı 32, Konstantınos Haralambıdes 61, Vander 88 – Branko Ilıch 37, Dmıtrıı Shomko 63, Roher Kanıas 71, Marın Anıchıch 87. Elaman Qońyr. Derek: egemen.kz. Sýret: footboom.kz.