Dárýmender festıvali

Táýelsizdigimizdiń arqasy. Elimizde tuńǵysh ret ótkizilip jatqan sharalar legi az emes. Almatyda Qazaq Taǵamtaný akademııasynyń bas­ta­­masymen jáne ACIERTO kompanııasy qoldap, birinshi ret dárýmender men mıneraldar festıvali bolyp ótti. Alaıda, búginde elimizde 200-ge tarta dárýmen satatyn, taratatyn deldal jáne óndirýshi kompanııa bolsa, qazirge onyń saýsaqpen sa­nar­lyǵy ǵana osy sharaǵa qatysyp, aǵzaǵa nár, ál-qýat beretin ónim­deriniń sapasyn nasıhattady. Eń bastysy, aldaǵy ýaqytta dárýmen­der festıvalin ótkizý dástúrge aınalmaq. Igi bastama barysynda Qazaq Taǵamtaný akademııasynyń prezı­den­ti – elimizdiń densaýlyq sala­syn damytýǵa ólsheýsiz úles qosqan professor Tóregeldi Sharmanov­tyń: “Álemdegi 6 túrli ajaldan ta­ǵam mázirin ózgertý arqyly ǵana qashyp qutylýǵa bolar edi”, deıtin qanatty sózi aıtylmaı qalǵan joq. Dárýmender festıvaline qatysý­shy­lar ártúrli atalymdar boıynsha sapa baıqaýyna da qatysty. Al Saraptama komıssııasy eń úzdik dep tanylǵan “Nıkomed”, “Farko” “Fıtoleým” jáne “Art-laıf” kompanııalaryn arnaıy dıp­lomdarmen marapattady. Kóp­te­gen dárigerlerdiń kóńilinen shyq­qan “Vıta Farm+” jáne “Omega-3 Kardıo” kompanııalary bolsa  “Dárigerler kózaıymy” júldesiniń ıegerleri atandy. Qazaq Taǵamtaný akademııasy­nyń vıse-prezıdenti Igor Soı­dyń aıtýynsha, mundaı shara tu­tynýshylarǵa jáne búgin arnaıy kelgen dárigerlerge  tikeleı taýar óndirýshilermen áńgimelesýge jáne preparattary týraly tolyq aqpa­rat alýǵa múmkindik týdyrady. – Aldaǵy ýaqytta bul sharany dástúrli túrde ótkizýdi josparlap otyr­myz. Búgin, ókinishke qaraı, eli­mizde jumys isteıtin 200 kompa­nııan­yń 10-y ǵana qatysty. Bola­shaqta qatysýshylar sany artady degen senimdemin. Bul shara eń al­dymen halyqty dárýmender týraly aqparattandyrý úshin uıymdas­ty­rylyp otyr. Túsinik jumysynyń az­dyǵynan kópshiligi dárýmendi kún­delikti tamaq rasıonyna engi­zip, ishý kerek ekendigin bile ber­­meıdi. Bular kóptegen aýrýlardyń aldyn alýda paıdasy zor, – dedi Igor Soı. Osy bir qyzyqty shara qala­lyq­tardy eleń etkizgeni anyq. Fes­tıvalǵa qarapaıym tutynýshylar ǵana emes, respýblıkalyq sanı­tar­lyq-epıdemııalogııalyq qyzmet mamandary, belgili ǵalymdar qa­tysyp, oǵan ǵylymı sıpat ber­genin de atap ótken jón. “Atrıým” oıyn-saýyq ortaly­ǵynda ótken festıvalǵa kelýshiler de ártúrli baıqaýlar men lotereıa oıyndaryna qatysyp, óndirýshi­ler­diń syılyqtaryna ıe boldy.  Sondaı-aq balalarǵa salamatty ómir saltyn nasıhattaıtyn  mýlt­­fılmder kórsetildi. Saltanatty jaǵdaıda ótken festıvalda Mem­­­lekettik syılyqtyń laýreattary Igor Soı, Iýrıı Sınıavskıı syndy professorlar dárýmender týraly, onyń sońǵy jetistikteri týraly oı bólisti. – Búgingi jumysbastylyq, psı­hologııalyq kúızelis pen megapolıs shýyly jaǵdaıynda tek kúndelikti azyqpen aǵzaǵa qajetti qýatty alý múmkin emes. Adamǵa táýliktik aǵza­ǵa qajetti kalsııdi alý úshin kemi jeti balyq nemese 4 kılo seldereı jeýi kerek. Bul múmkin emes! – dep sóz bastaǵan Durys tamaqtanýdy nasıhattaý jónindegi ulttyq úıles­ti­rýshy Gaýhar Úshkempirovany Qazaq Taǵamtaný akademııasynyń vıse-prezıdenti Iýrıı Sınıavskıı de qýattap, adamdardyń jasyna, jynysyna, ómir súrý saltyna qaraı dárýmenderdi tańdap, turaq­ty paıdalanyp otyrý qajettigin ǵylymı turǵyda dáıektedi. Qysqasy, buryn-sońdy bolyp kórmegen festıval qalalyqtardy bir eleńdetip, eldiń nazaryn sala­m­at­tylyqqa taǵy bir aýdaryp ótkeni aqıaqat. Aldaǵy jyldary oǵan qatysýshy kompanııalar sany da, kelýshiler qatary da arta túsedi dep kútilýde. Aınash ESALI, Almaty