Memleket basshysy MAGATE bas dırektoryn qabyldady

ASTANA. 27 tamyz. Elbasy MAGATE-nyń bas dırektory Iýkııa Amanony qabyldady. Bul týraly akorda.kz habarlady. Kezdesý barysynda Elbasy MAGATE bas dırektoryn Qazaqstanda az baıytylǵan ýran bankin qurý týraly kelisimge qol qoıylýymen quttyqtady. Nursultan Nazarbaev bul oqıǵa jemisti ózara is-qımyldyń qorytyndysy bolǵanyn atap ótti. «Qazaqstan Semeı polıgonyn japty, biz iri ıadrolyq qarýdan bas tarttyq. Elimiz ıadrolyq qarý taratpaý saıasatyn júrgizip keledi. Bul oraıda bizdiń kózqarastarymyz uqsaıdy dep oılaımyn», – dedi Qazaqstan Prezıdenti. Prezıdent Irannyń ıadrolyq baǵdarlamasyna qatysty Qazaqstanda ótken kelissózderdiń birinshi raýndy kezinde osyndaı Banktiń qorynan ıadrolyq otyn alý múmkindigin Qazaqstan tarapy birneshe ret aıtqanyn atap ótti. Iý.Amano shartqa qol qoıý shyn máninde tarıhı oqıǵa bolǵanyna toqtaldy. «Búginde atom elektr stansasyn salýǵa nıetti nemese sondaı joldy qarastyryp otyrǵan elder ýran naryǵyndaǵy kez kelgen aýytqýlarǵa qaramastan, az baıytylǵan ýran satyp alý múmkindigi bar ekenine senimdi bola alady. Osy mańyzdy bastamany júzege asyrý barysynda Sizdiń kóshbasshylyǵyńyz negizgi ról atqardy. MAGATE atynan jáne búkil halyqaralyq qoǵamdastyq atynan Sizge óz rızashylyǵymyzdy bildirgimiz keledi», – dedi Iýkııa Amano. MAGATE bas dırektory sondaı-aq ıadrolyq qarýdy taratpaý rejimin nyǵaıtý turǵysynan tarıhy baı, barlyq qajetti ınfraqurylymy bar Qazaqstan mundaı bankti ornalastyrýǵa eń laıyqty úmitker ekenin aıtty. Kezdesý sońynda Memleket basshysy qazaqstandyqtarǵa osy tarıhı qadamdy túsindirýdiń mańyzdylyǵyn atap ótti. «Qandaı da bir eldiń ıadrolyq baǵdarlamasyn ýrandy baıytýdan bastaýy barshany alańdatady. Bul onyń zańsyz taralý qaýpin týdyrady. Al biz ózimizdiń ıadrolyq sıkldy qurmaı-aq beıbit atomdy paıdalanýǵa jaǵdaı jasaımyz», – dedi Nursultan Nazarbaev. Aıdar О́risbaev. Derek, sýret: akorda.kz.