Maqsat – jastar belsendiligin arttyrý

Keshe Astanada Qazaqstan Respýblıkasy Prezıdenti janyndaǵy Jastar saıasaty jónindegi keńestiń 6-shy otyrysy ótti. Otyrysta “Qazaqstan Respýblıkasyndaǵy bilim salasyn jetildirýdiń 2011-2020 jyldarǵa arnalǵan memlekettik baǵdarlamasynyń” jaı-kúıi, onyń ishinde eldegi jastar qaýymyn tolǵandyrǵan máseleler qaraldy.Jastar saıasaty jónindegi keńes 2008 jyly Elbasynyń Jarlyǵy negizinde qurylǵan bolatyn. Onyń quramy 37 jastan turady. Olar – memlekettik organdardyń, respýb­lı­kalyq jáne óńirlik jastar uıymdarynyń, ǵylymı jáne shy­ǵarmashyl jastardyń ókilderi. Ke­ńestiń kózdegen maqsaty – mem­le­kettik jastar saıasatyn jetildiretin sharalar shoǵyryn ázirleý, osy salada Memleket basshysy mindet­tegen tapsyrmalardyń oryndalýyn qadaǵalaý eken. Jıyn kezinde Pre­mer-Mınıstr Keńsesiniń jetek­shisi, atalǵan keńestiń tóraǵasy Ǵabıdolla Ábdirahımov bolashaqta bul mindetti qaltqysyz oryndaýǵa mán beriletinin tilge tıek etti. Otyrys barysynda sóz alǵan elimizdiń Bilim jáne ǵylym vıse-mınıstri Serik Yrsalıev búginde Qazaqstandaǵy jastardyń sany 4 mln.-nan asyp jyǵylatynyn, sol sebepti de olar áleýetti topqa jata­tynyn atap ótti. Onyń aıtýynsha, jastardyń qoǵam ómirine belsene aralasýy, memlekettiń damýyna óz úlesterin qosýy aıryqsha mańyzǵa ıe. “Ol úshin bilim salasy júıesin modernızasııalaý, sol arqyly bá­se­kege qabiletti ıntellektýaldy ultty qalyptastyrý, jastardyń boıyndaǵy ultjandylyq rýhty qalyptastyrý qajet”, deıdi Serik Áztaıuly. Basqosý kezinde oǵan qatysý­shy­lar memlekettik jastar saıasa­tynda oryn alyp otyrǵan birqatar ózekti máselelerdi alǵa tartty. Oǵan jastar arasyndaǵy tárbıe ju­mystaryn úılestiretin ortalyq­tandyrylǵan júıeniń jolǵa qoı­yl­maýy, eldegi jastardyń nebary 22 paıyzynyń ǵana jastar uıym­dary jumystaryna aralasýy, jas­tar saıasaty salasyndaǵy kúrdeli túıinderdi sheshýge atsalysyp júrgen jastardyń azdyǵy sekildi máselelerdi jatqyzýǵa bolady. Elordadaǵy L.N.Gýmılev atyn­daǵy Eýrazııalyq ulttyq ýnı­versıtettiń rektory Baqytjan Ábdi­raıymov óz sózinde el jas­ta­ryna memleket tarapynan aıryq­sha nazar aýdarylyp otyrǵanyn, keńes otyrysy osynyń bir kóri­nisi ekenin atap ótti. “Jastardy ártúrli topqa bólýge bolady. Olardyń árqaısysynyń óz maqsat-múddeleri bar. Problemalary da bar. Búginde stýdentter qaýymyn tolǵandyra­tyn másele jataq­hana máselesi ekeni belgili. Má­selen, L.N.Gý­mılev atyndaǵy Eýrazııa ulttyq ýnıversıtetindegi jastar­dyń 30 paıyzy ǵana jataq­hanamen qam­tamasyz etilgen. Sol se­bepti, bul aıryqsha nazardy qa­jet etedi. Ekinshi bir másele – ol ju­myssyzdyq. Búginde joǵary oqý oryndaryn bitirgen jastardyń basym kópshiligi jumyssyz júr. Bul dıplom sapasynyń tómendigin kórsetedi. Jumyssyzdyq másele­si­niń týyndaýyna, jastardyń ju­mys­qa ornalasýyna syrttaı oqý bólimi de áser etýde. Sondyqtan, bul rette kóp jumystar atqarylýy qajet”, deıdi Baqytjan Jaryl­qa­syn­uly. Otyrys kezinde sóz alǵan “Qazaqstan jastarynyń kongresi” zańdy tulǵalar birlestiginiń at­qa­rýshy dırektory Nurlan Sydyqov joǵary oqý oryndarynda tárbıe máselelerimen aınalysatyn ma­man­dar sanynyń azdyǵyna toq­talyp ótti. Ol sondaı-aq, eńbekpen qamtý máselesine aıryqsha mán be­rip, jastardy kógaldandyrý ju­mystaryna kóptep tartý qajettigin tilge tıek etti. “Jasyl el” jasaq­tarynyń sanyn 3 esege deıin art­tyrý qajet. Muny “Jasyl damý” baǵ­darlamasyna da engizýge bola­dy”, dedi bul týrasynda Nurlan Sydyqov. Otyrys barysynda jastar te­le­arnasynyń jumysyn júıelen­di­rý, ınternettegi jastarǵa arnalǵan saıttardyń durys jolǵa qoıylýy­na mán berý, bul rette olardy ult­jan­dylyqqa tárbıeleıtin, tanym­dyq aqparat beretin saıttardyń sanyn arttyrý, sondaı-aq tehnı­ka­lyq jáne kásibı bilim berý júıesin jandandyrý máseleleri de nazardan tys qalmady. Jastar saıasaty jónindegi keńes tóraǵasy Ǵabıdolla Ábdirahımov óz kezeginde bul máselelerdiń barlyǵy da eskerilip, nazarǵa alynatynyn atap kórsetti. Otyrys barysynda oǵan qatysýshylar baǵdarlamanyń ma­ńyz­dy tustaryna aıryqsha toqta­lyp ótti. Máselen, bolashaqta osy baǵdarlama aıasynda jastardyń patrıottyq is-sharalarǵa tarty­lýyn 78 paıyzǵa, al olardyń jas­tar uıymdaryndaǵy qataryn 22 paıyzdan 29 paıyzǵa deıin ulǵaıtý, jastar saıasaty salasyndaǵy túıt­kildi máselelerdi sheshýge atsa­ly­satyn jastardyń sanyn 55 paıyzǵa deıin arttyrý kózdelip otyrǵan kórinedi. Láıla EDILQYZY.