Aman Tóleev bılikke narazylyq retinde partııadan shyǵady

ASTANA. 3 sáýir. Reseıdiń Kemerovo oblysynyń gýbernatory Aman Tóleev Kremlge qyr kórsetý retinde óziniń «Edınaıa Rossııa» partııasynan shyǵatynyn málimdedi. Bul týraly «Rodnoı Novokýznesk» saıty habarlady. Portal muny «Edınaıa Rossııa» partııasy qalalyq bólimshesindegi mánbesine súıenip jetkizgen. Partııa ókili jýrnalısterge Aman Tóleevtiń bul saıası partııamen barlyq qarym-qatynasyn úzildi-kesildi úzý oıy bar ekenin aıtqan. Kemerovo oblysynyń 4 máýritten bergi úzdiksiz basshysy 2003 jyldan beri bıliktiń «Edınaıa Rossııa» partııasynyń múshesi bolyp keledi. Osy ýaqyttyń óne boıynda ol barlyq deńgeıdegi saılaýlarda partııanyń aımaqtyq tiziminiń udaıy basynda turǵan. «Biraq Tóleevtiń «EdRa»-nyń keıbir fýnksıonerlerimen qarym-qatynasy taıaý arada buzyldy, - dep jazady «Rodnoı Novokýznesk» saıty. – Gýbernatordyń «Edınaıa Rossııamen» arasynyń nasharlap ketýiniń yqtımal sebebi partııa bas keńesiniń hatshysy, novokýzneskilik Sergeı Neverovtiń órkókirektigi bolǵan sııaqty. Uzaq jyldar boıy tap sol tulǵa Kýzbass gýbernaıtory men «Edınaıa Rossııa» arasyndaǵy baılanysshy býyn bolyp kelip edi. Tóleevtiń arqasynda «EdRa»-nyń aımaqtaǵy reıtıngisi de joǵary bolyp turdy. Al gýbernator muny dýmadaǵy oryntaqty óz aınalasyndaǵy adamdarmen tolyqtyryp otyrýǵa paıdalandy. Internet-portaldyń málimeti boıynsha, qazir Neverov alda bolatyn aımaq basshysy saılaýyna tutas bir «novokýzneskilik bloktyń» qatysýyn Kreml arqyly sheshý jolynda belsene jumys jasap júr. Bul blokqa onyń ózi de kiredi. Tizimde budan bólek, bir kezderi «Iýjkýzbassýgolde» jáne oblystyq ákimshilikte istegen, qazir RF prezıdentiniń keńesshisi bolyp júrgen Anton Kobıakov pen Sergeı Kýznesov bar. Saıttyń málimetine qaraǵanda, Aman Tóleev «Edınaıa Rossııanyń» aımaqtyq bólimshesiniń qarymta soqqy berý úshin de onyń qatarynan shyqqaly otyr. Osy oraıda «Rodnoı Novokýznesk» portaly: «Endi Kýzbasstyń kóptegen saıasatkerleri men depýttary odan úlgi alyp, «Edınaıa Rossııadan» gýbernatorlyq» Slýjý Kýzbassý» blogyna ótedi dep kútilip otyr, - dep jazady saıt taǵy. – Bul saıası qadam «Edınaıa Rossııanyń» Kemerovo oblysyndaǵy bólimshesin joıyp qana qoımaıdy, onyń basshysy Neverovtiń partııa fýnksıoneri retindegi bedeliniń byt-shytyn shyǵarady. Sonymen birge, ol Kremlge aımaq elıtasy Tóleevtiń tóńiregine toptasqanyn tanytyp beredi. Al bıylǵy qyrkúıek aıynda ótetin gýbernator saılaýy qarsańynda munyń mańyzy zor», - dep «Edınaıa Rossııa» qalalyq bólimshesi ókiliniń sózinen dáıekteme keltiredi. Kýzbass gýbernatory partııanyń jergilikti bólimshesi quramynan shyǵatyn sheshim qabyldap otyrǵanyn oblystaǵy basqa saıttar da jazyp jatyr. «Tóleev jıyn shaqyryp, óziniń narazylyǵyn anyq bildirdi. Ol partııanyń qazir óziniń múddesin qorǵamaı otyrǵanyna razy emes. Qazir federaldy BAQ-tarda Tóleevtiń gýbernator saılaýyna qatysýy máselesi talqylanýda. Ony ózi uzaq jyldar aımaqtaǵy barlyq deńgeıdegi saılaýlarda óte joǵary prosent aldyryp berip kelgen «Edınaıa Rossııanyń» osy tusta áliptiń artyn baǵý pozısııasyn ustanyp otyrǵany yzalandyrady, - dep jazady SIo42. – Jıynnyń sońynda ol partııanyń ózi úshin quramynan shyqqannan basqa eshteńe qaldyrmaǵandaı tirlik etip júrgenin ashyqtan-ashyq aıtty». Alaıda, Aman Tóleevtiń partııa qatarynan shyǵatyny jóninde oblystyq ákimshiliktiń baspasóz qyzmetinen ázirge birde-bir ret málimdeme berilgen emes. Murat Aıtqoja. Mánbe: Rodnoı Novokýznesk. Sýret: VKontakte.