Qostanaıda saflor maıy óndiriletin bolady

Investorlar Qostanaı óńirine jıi atbasyn buratyn boldy. Jaqynda oblys ákimi Nuraly Sádýaqasov pen «Kaz-ir Agro» Qazaqstan-Iran kompanııasynyń bas dırektory  Hamıdreza Zabıhollah Alınagııan arasyndaǵy áńgime aýyl sharýashylyǵyna ınvestısııa tartý jóninde boldy. Búginde «Kaz-Ir Agro» jaýapkershiligi shekteýli seriktestigi saflor ósirýge jáne odan saflor ma­ıyn óńdep, kúnjara óndirýde mamandanyp, jaqsy tabysqa jetken. О́ndiris Jambyl oblysynda ornalasqan. Kásiporyn aıyna 100 myń lıtr saflor maıyn óńdeıdi, al 2017 jyly kompanııa bul kórsetkishti 500 myń lıtrge jetkizýdi mejelep otyr. Alynǵan ónim Reseıge, Grýzııaǵa, Iranǵa, Amerıka Qurama Shtattaryna, Qytaıǵa eksporttalady. Kompanııa juǵymdy ári emdik qasıeti mol azyqty Qostanaı óńiriniń qunarly topyraǵyna da egýdi oılas­tyryp, ınvestısııa quıýǵa táýekel etipti. Buryn egin sharýashylyǵy negizinen astyq óndirýge baǵyttalǵan Jitiqara aýdanynda endi saflor ósimdigi ósiriletin bolady. Bul úshin osy aýdandaǵy Volgograd selosy aýmaǵy tańdaldy. Jitiqara oblystaǵy ındýstrııalyq aımaq qurylyp jatqan aýdan, sondyqtan osynda saflor ma­ıyn óńdeıtin óndiristik baza da salynatyn bolady. Aldyn ala esepteýler boıynsha, maı óńdeý zaýytyn salý úshin 300 mıllıon teńge qarjy qajet. Onyń 50 mıllıon teńgesin kompanııa ózi salady, qalǵan 250 mıllıon teńge nesıe qarajaty retinde tartylmaq. Josparlanǵan joba boıynsha zaýyt táýligine 7 tonna maı shyǵarady, kásiporyn jergilikti turǵyndarǵa 40 jumys ornyn usynatyn bolady. Jitiqara aýdany basshylary men mamandary ınvestormen birlesip jumysty bastap ta ketti. Názıra JÁRIMBETOVA, «Egemen Qazaqstan». QOSTANAI.