Shalǵaıdaǵy mádenı-saýyqtyrý kesheni

jeke kásipkerlerdiń qarjylyq qoldaýymen salynyp,  paıdalanýǵa berildi Qurtaı aýyldyq okrýgine qarasty Jarqyn aýylynda jarty myńǵa jýyq adam turady. Shańyraǵy shaıqalmaǵan, tútini túzý ushqan eńseli eldi mekende birqatar áleýmettik máseleler sheshimin tapqanymen, klýbtyń bolmaýy, sport zalynyń tarlyǵy saldarynan jastarǵa qalypty mádenı demalystyń týdyrylmaýy úlkenderdi qatty oılandyratyn. Osy sebepti jurtshylyq atynan jazylǵan hat oblystyq ákimdikke joldanyp, mádenı sharalar men sport jarystaryn uıymdastyratyn ortalyq salyp berý suralǵan bolatyn. Jaýap kóp kúttirgen joq. О́tinish óńir basshysy Erik Sultanovtyń tarapynan qoldaý tapqanyn estip, turǵyndar qýanysyp qalǵan. Kóp uzamaı “Sevımstalkon” JShS men “Mamontov” JK keshendi turǵyzýdy óz mindetterine alyp, qurylys jumystaryna Jyldam turǵyzylatyn ǵımarattar zaýyty, Petropavl qurylys materıaldary zaýyty sekildi jergilikti kásiporyndardyń bolat qurylǵylary, plastık terezeleri men esikteri keńinen paıdalanyldy.  Ne kerek, qysqa merzim ishinde 800 sharshy metrden astam aýmaqty alyp jatqan osy zamanǵy nysan boı kóterdi. Birinshi qabatta basketbol, voleıbol, shaǵyn fýtbol oınaıtyn standartty zal, jattyǵý jasaıtyn, tennısten, shahmat-doıbydan, toǵyzqumalaqtan jarys ótkizetin bólmeler, ekinshi qabatta kúres zaly orna­lasty. Talapqa saı jyly dárethana men dýsh bólmesi jumys isteıdi. Kópbeıindi keshen mekteptiń bý qazandyǵyna qosyldy. Dene shynyqtyrý-saýyqtyrý ortaly­ǵynyń ashylý saltanatyna qatysqan Erik Hamzauly jarqyndyqtardy aıtýly oqıǵa­men quttyqtap, balǵyn sportshylarǵa trenajerlar men doptardy syıǵa tartty. – Elbasy jergilikti bılik oryndaryna aýyldyq jerlerde buqaralyq sportty barynsha damytý talabyn qoıǵan bolatyn. Osy baǵytta Qyzyljar óńirinde  kóptegen sharalar atqarylyp keledi. Oblys ortalyǵynda jabyq muz aıdyny, ámbebap sport kesheniniń qurylystary júrgizilýde. Ǵ.Músirepov aýdanynda demeýshilik kómekpen júzý basseıni bar sport ortalyǵy iske qosyldy.  Aldaǵy ýaqytta bul sala boıynsha memleket-jekemenshik áriptestigin nyǵaıta beretin bolamyz. Myna nysanǵa shaǵyn jáne orta bıznes ókilderi 57 mıllıon teńge qarajat jumsady. Budan bylaı mádenıet oshaǵynyń mindetin de atqaratyn bolady. Ortalyqtyń buqaralyq sportty jandandyryp, ulttyń densaýlyǵyna qyzmet etýine tilektespin,–dedi E. Sultanov óz sózinde. Ardagerler keńesiniń tóraǵasy Muqanaı Baıǵojın, japon kúresinen sport sheberi Erkebulan Qurmanov Elbasynyń salıqaly saıasatyn qoldap, ıgilikti iske bastamashy bola bilgen kásipkerler Álimjan Ysmaıylovqa, Sultanbek Gazdıevke shynaıy alǵystaryn bildirdi. Tusaýkeser rásiminen keıin alys-jaqynnan jınalǵan qonaqtar keshendi aralap, sporttyq jabdyqtalýymen tanysty. Tımırıazev qazaq mektep-ınternatynyń, Dmıtrıevka, Internasıonal jáne Jarqyn orta mektepteriniń qurama komandalarynyń basketboldan jáne qazaqsha kúresten kúsh synasýyn tamashalady. – Aýylda 100-ge jýyq otbasy bar. Eki qabatty mekteptiń sport zaly, aýyl jastaryn aıtpaǵan kúnniń ózinde, ártúrli seksııalar ótkizýge oqýshylarǵa tarlyq etetin. Endi shahmat-doıby, toǵyzqumalaq, tennıs seksııalaryn ótkizetin arnaıy kabınetter bar. Asylbek Baılın jetkinshekterdi aptasyna eki ret qazaqsha kúreske baptaıtyn bolady. Jattyǵý qurylǵylary qoıylǵan bólme qazirdiń ózinde oqýshylardyń súıikti orny sanalady. Kórshi eldi meken jastarynyń osynda kelip jattyǵýyna, túrli saýyq keshterin uıymdastyrýyna árkez jol ashyq, – deıdi Jarqyn orta mektebi dene tárbıesi pániniń muǵalimi Ádilhan Qajybaev. О́mir ESQALI, «Egemen Qazaqstan». Soltústik Qazaqstan oblysy, Tımırıazev aýdany. Sýretti túsirgen Amangeldi BEKMURATOV.