Elektr qýatynyń biryńǵaı tarıfi belgilendi

Ústimizdegi jyldyń 1 tamyzynan bastap elimizdiń barlyq óńirlerinde “KEGOC” AQ júıeleri boıynsha elektr energııasyn taratýdyń biryńǵaı tarıfi engiziletin bolady. Tutynýshynyń qaı jerde turatyndyǵyna jáne Ulttyq elektr júıesine qosylý qashyqtyǵyna qaramastan, elektr qýatyn taratý tarıfi qosymsha qun salyǵynsyz (QQS) biryńǵaı elektr energııasynyń 1 kVt/saǵatyna 0,94 teńge bolyp belgilendi. Bul týraly keshe Qazaqstan Respýblıkasynyń Tabıǵı monopolııalardy retteý agenttiginde ótken baspasóz máslıhatynda agenttik tóraǵasynyń orynbasary Anatolıı Shkarýpa málimdedi. “KEGOC” AQ júıeleri boıyn­sha elektr energııasyn taratýǵa biryńǵaı tarıftiń engizilýi Almaty qalasynda, Almaty jáne Qostanaı oblystarynda tutynýshylardyń elektr qýatyna tóleıtin tarıfin 06-dan 3,2 paıyzǵa deıin arzan­da­tý­ǵa múmkindik berdi. Buǵan deıin bul óńirlerde elimiz boıynsha elek­tr qýatynyń eń joǵary tarıfi qoldanylyp kelgen bolatyn. Bú­gin­gi tańda energııa únemdeý jáne energııa qýatynyń tıimdiligin art­tyrý Memleket basshysynyń kún tártibine qoıyp otyrǵan basty mindetteriniń biri bolyp tabylady. Sondyqtan Úkimet tapsyrmasymen agenttik energııa únemdeý jónindegi sharaǵa belsene qatysyp keledi. О́t­ken jyldyń 1 qańtarynda eli­miz­diń “Elektr energetıkasy tý­ra­ly” zańyna engizilgen ózgeristerge sáıkes elektr energııasyn satyp alatyn barlyq tutynýshylar elek­tr qýaty úshin táýlik aımaqtary boıynsha saralanǵan tarıfter arqyly aqy tólep kelgen. Mundaı tarıf qoldaný tásili óńirlerde elek­tr energııasyn utymdy paıda­la­nýǵa jáne tutynýshylardyń qarajattaryn edáýir únemdeýge múm­kindik berdi. Endi elimizdiń barlyq óńirlerinde  biryńǵaı ta­rıf júıesiniń engizilýine baıla­nys­ty tutynýshylardyń elektr qýaty úshin tóleıtin tólemderi taǵy da tómendeıtin boldy. Atap aıtqanda, Almaty qalasy­nyń jáne Almaty oblysynyń “Almatyenergosbyt” JShS qyzmet kórsetetin aımaqtarynda 1 kVt/saǵat energııa qýatynyń tarıfi QQS-ny eseptemegende 10,1 teńge bolyp, 0,6 paıyzǵa tómendedi. Bul óńirlerdiń tutynýshylary elektr qýatyn belgilengen mejeden asyryp paıdalanǵan jaǵdaıda 1 kVt/saǵatqa 13,57 teńge tóleıdi. Alma­ty qalasynda aımaqtyq tarıf 0,6 paıyz tómendedi. Sóıtip, tamyz aıynan bastap qalada naqty tul­ǵa­lar úshin kúndiz tutynatyn elektr qýatynyń 1 kVt/saǵaty QQS-ny qosa eseptegende 14,53 teńge, al tún­gi merzimde 3,21 teńge bolyp bel­gilendi. Zańdy tulǵalar úshin Almaty qalasynda kúndizgi tarıf 11,31 teńge, túngi tarıf, 3,21 teńge bolmaq. “JetisýEnergotreıd” JShS qyzmet kórsetetin Almaty ob­lysynyń aımaǵynda elektr qýatynyń tarıfi 0,17-den 1,6  paıyz­ǵa deıin tómendep, QQS-ny qospaǵanda 10,75 teńge bolyp belgilendi. Qostanaı oblysy boıynsha “KostanaıskııEnergoSentr” JShS qyzmet kórsetetin aımaq­tar­da, ıaǵnı Qostanaı qalasy men 16 aýdanda elektr energııasynyń tarıfi 2,6 paıyzǵa tómendep, QQS-ny qospaǵanda 9,98 teńge bolyp belgilendi. Sol sııaqty saralanǵan tarıf deńgeıi de 1-3,6 paıyzǵa tó­mendedi. Al Lısakov, Rýdnyı, Je­ti­qara qalalarynda tıisinshe tarıf orta eseppen 3,4, 2,8 jáne 3,2 paıyzǵa tómendeıdi. Sonymen birge “Astanaener­go­sbyt” JShS-nyń elektr ener­gııa­syn óndirý kólemin arttyrýyna, shyǵyndardy ońtaılandyrýyna baılanysty elektr qýatynyń or­ta­sha tarıfi 5,24 paıyzǵa tómen­dedi. Endi astanalyqtar elektr qýatynyń kVt/saǵatyna QQS-ny qospaǵanda 7,41 teńge tóleıtin bo­lady. Tamyz aıyna deıin bul kór­setkish 7,96 teńge deńgeıinde bolyp kelgen. Sóıtip, tamyz aıynan bastap elektr peshterin paıdala­na­tyn naqty tutynýshylar elektr qýatynyń kVt/saǵatyna QQS-ty qosa eseptegende 6,84 teńge tóleı­tin bolady. Bul rette 1 adamǵa bel­gilengen norma aıyna 90 kVt/sa­ǵattan aınalady. Al elektr pesh­te­rin paıdalanbaıtyn tutynýshy­lar­dyń elektr qýatyna tóleıtin ta­rıfi 15,3 paıyzǵa tómendep, 6,96 teńgeni quraıdy. Bul rette 1 adamǵa belgilengen norma aıyna 70 kVt/saǵattan aınalady. Belgilengen nor­madan artyq paıdalanylǵan árbir kVt/saǵat elektr qýaty úshin tarıf 9,96 teńge bolyp belgilendi. Naqty tulǵalar úshin túngi merzim­degi kVt/saǵat elektr qýatynyń tarıfi 2,26 teńge bolsa, zańdy tul­ǵalar úshin 8,3 teńge bolmaq. Naqty mysal keltiretin bolsaq, Astana qalasyndaǵy gazben jabdyqtalǵan úıde turatyn úsh adamnan quralǵan otbasy aıyna 210 kVt/saǵat elektr qýa­tyn paıdalanǵan kezde aıyna 265 teńge únemdeıtin bolady. Elimiz boıynsha óńirlerde elektr energııasyna saralanǵan ta­rıfter belgilengen 2008 jyldan beri elektr qýatyn tutynatyn jeke jáne zańdy tulǵalar jylyna 1,1 mıllıard teńge qarjy únemdegen. Sonymen birge tutyný kólemin tó­mendetýge, elektr qýaty kóp tu­ty­nylatyn ýaqyttardy ońtaılandyrý nátıjesinde birshama únemshildikke qol jetkizildi. Osy merzim ishinde elektr energııasyn tutyný kólemin tómendetýge baıla­nys­ty elektr qýa­tyn óndiretin ny­sandar 20-30 myń tonna nemese 500 vagon kómir únemdedi. О́z kezeginde bul aýany las­taıtyn zııandy zattar­dyń azaıýy­na jaǵdaı jasady. Jylqybaı  JAǴYPARULY.