Kókshetaý  kórkeıip  keledi

Oblys ortalyǵynda qurylys ındýstrııasy ekpin ala túsýde. Ony 2014 jyly 105,9 myń sharshy metr turǵyn úıdiń paıdalanýǵa berilýinen ańǵarýǵa bolady. Bul burnaǵy jylmen salystyrǵanda 103 paıyzdyq kórsetkishke teń. Sondaı-aq, qurylys jumystarynyń kólemi 13,1 mıllıon teńgeni qurap, 109 paıyzdyq deńgeıge kóterildi. Negizgi kapıtalǵa quıylǵa ınvestısııanyń kólemi 26,5 mlrd. teńgeni qurady. Munyń ishinde respýblıkalyq jáne jergilikti bıýdjetten balalar baqshasy men oqý oryndaryna japsarlas salynǵan ǵımarattardyń qurylysyna 1 mıllıard 241,5 mıllıon teńge, turǵyn úılerdiń qurylysyna jáne ony abattandyrý, ınjenerlik jelimen qamtamasyz etýge 482,1 mıllıon teńge, áleýmettik sala nysandarynyń jobalyq-smetalyq qujattamalaryn daıyndaýǵa jáne Dostyq úıiniń qurylysyna 326,5 mıllıon teńge qarjy bólinip, tolyq ıgerilgen. Bıylǵy meje de bıik bolǵaly tur. Atap aıtqanda, Kókshetaý qalasynda aýysymyna 150 adamdy qabyldaý múmkindigi bar onkologııalyq dıspanser emhanasyn jáne oblystyq balalar aýrýhanasynyń juqpaly aýrýlar bólimshesiniń ǵımaratyn salý josparlanýda. Sondaı-aq, jańa neke saraıynyń ǵımaraty boı kóterip, «Iýbıleınyı» stadıony kúrdeli jóndeýden ótkiziledi, al «Revolıýsııa kúresshileri» baǵynda shańǵy-rollerlik keshen ashylady dep kútilýde. Baqbergen AMALBEK,   «Egemen Qazaqstan». Aqmola oblysy.