«Ardagerlerdi ardaqtaıyq» aksııasy

Keshe Astanada «Nur Otan» partııasynyń belsendisi, Májilis depýtaty Nadejda Petýhovanyń basshylyǵymen «Ardagerlerdi ardaqtaıyq» jobasynyń aıasynda Uly Otan soǵysy ardagerleriniń ómir súrý jaǵdaıyn qaıta zertteý nátıjeleri boıynsha «Ult densaýlyǵy» saraptamalyq tobynyń selektorlyq baılanys rejimindegi keńesi ótti. Otyrys jumysyna Parlament Májilisi men máslıhattardyń depýtattary, Densaýlyq saqtaý jáne áleýmettik damý mınıstrliginiń basshylyǵy, «Ardagerler uıymy» RQB, úkimettik emes uıymdardyń ókilderi qatysty. Otyrysta Uly Otan soǵysy ardagerleriniń ómir súrý jaǵdaıy boıynsha júrgizilgen zertteý nátıjeleri men dári-dármekpen qamtamasyz etý jaǵynan olardy áleýmettik qorǵaý sharalary talqylandy. Partııalyq kýrator Nadejda Pe­tý­hovanyń aıtýynsha, «О́tken jyly «Arda­gerlerdi ardaqtaıyq» partııalyq joba­synyń aıasynda 5,4 myń Uly Otan soǵysy ardagerleriniń ómir súrý jaǵ­daıy zerttelip, nátıjeleri boıynsha par­tııa tarapynan 10 myńnan astam prob­lemalyq másele baqylaýǵa alyndy». Atalǵan jumys jalǵasýda jáne qaıta júrgizilgen 5 myń ardagerdiń ómir súrý jaǵdaıyn zertteýdiń nátıjeleri boıynsha kóbinese medısınalyq qamtamasyz etýge qatysty 5,6 myń másele partııa baqylaýyna alyndy. Osy máselelerdi sheshý maqsatynda «Nur Otan» partııasy memlekettik organdarmen, úkimettik emes uıymdarmen birlese otyryp, ardagerlerdi úılerinde dıspanserlik qaraý, stomatologııalyq medısınalyq kómek, stasıonarlyq emdeý, medısınalyq-áleýmettik qyzmet jasaý, dári-dármekpen, jedel járdemniń elektrondy belgi bergishpen qamtamasyz etý sharalary kiretin júıeli jumys uıymdastyrdy. Sonymen qatar, turaqty kómek kórsetý maqsatynda árbir ardagerge bastaýysh partııalyq uıymdar jáne «Jas Otan» jastar qanaty qatarynan eriktiler bekitilgen. «Ardagerler uıymy» Respýblıkalyq qoǵamy Ortalyq keńesiniń tóraǵasy О́mirzaq Ozǵanbaev: «Otandyq densaýlyq saqtaý salasyn damytý úshin elimizde az nárse jasalyp jatqan joq. Soǵys ardagerleriniń medısınalyq qamtamasyz etilýine, sonyń ishinde Jeńis mereıtoıyna daıyndyq barysynda júzege asyp jatqan qosymsha sharalar úshin erekshe alǵys bildiremiz», dedi. Keńes nátıjesi boıynsha tıisti memlekettik organdarǵa Uly Otan soǵysy ardagerlerin medısınalyq qamtamasyz etý sapasyn odan ári jaqsartý boıynsha usynystar joldanatyn bolady. Jaqsybaı SAMRAT, «Egemen Qazaqstan».