Shoq tildi shaıyr – Shorabek

Shorabek Aıdarov aıtys sahnasyna alǵash ret 1989 jyly shyǵypty. Alǵashqy qarsylasy qyzylordalyq aqyn. Ol da Shora­bek sııaqty aýyldan kelgen, kádimgi qarapaıym, qap-qara jigit eken. Shókeń eldiń kúl­­kisin keltirip, quryq usta­ǵandaı qolyndaǵy dombyrasyn sahnaǵa moınynan súırep shyqqan kórinedi. Buryn-sońdy aıtys áleminde esimderi múldem estilmegen eki jigittiń poshymyna kórermenniń kóńili tolmaı, «Osy ekeýi ne jarytady?» degendeı, mensinbegen júzben qara­ǵandary anyq. Sodan sahnaǵa Shorabek qarsylasyna qarap: – Qaraǵym, sen de aq mańdaı, men de aq mańdaı, Qosylsa eki mańdaı sham jaqqandaı. Ekeýmiz Aı men Kúndeı bop otyrmyz, Vagonǵa kómir artqan soldattardaı, – dep, jınalǵan qaýymdy dý kúl­dirip, ótkir de utymdy ázil sózderimen eldi birden baýrap alyp ketipti. «Ádette aıtysta kó­rermen aqyn bir shýmaqty qaıyr­ǵanda kúledi emes pe? Bir aıtysta eldiń Shókeńniń shýmaǵynyń árbir qataryna rıza bolyp, ishek-silesi qatyp kúlgenine kýá bolǵanym bar. Aqynnyń «Eee-eı, aǵaıy-e-en...» degen daýylpaz únin esti­gende-aq el eleńdep, ezýine kúlki úıirile beredi. Osyndaı ózindik stılimen, eshkimge uqsamaıtyn ereksheligimen, taýyp aıtatyn qasıetimen eldi baý­rap aldy», deıdi bul jóninde Memlekettik syı­lyqtyń laýreaty, qoǵam qaı­ratkeri Bekbolat Tileýhan. Mine, sodan beri shırek ǵasyrdan astam ýaqyt ótti. Osy jyldar ishinde Jambyl jerinen túlep ushqan aqyn shynynda, eldiń asyǵa kútetin, árbir sózin yntyǵa tyńdaıtyn ardaqty aqynyna aınaldy. Sondyqtan Shorabek Aıdarovty shoqtyǵy bıik, aıtys­tyń aqtańgeri dep aıtýǵa ábden laıyq. Sońǵy jyldary aıtysta kórinbeı ketken aqynǵa «Siz nege aıtysty tastap kettińiz?» degen suraq qoıylǵan-dy. Sonda aqyn «Aıtysty men emes, aıtys meni tastap ketti», dep jyr dodasynda keıingi jas tolqynǵa jol bergenin aıtyp, aǵynan jarylǵan-dy. Áıtse de, arqaly aqyn aıtysty birjolata doǵarmaǵan eken. Buǵan Shókeńniń sońǵy kezderi birneshe ret aıtys sahnasyna kóterilip, óz qatary, zamandas aıtyskerlermen sóz qaǵystyrǵany dálel bolsa kerek. О́tken aptada Jambyl obly­syndaǵy Talas aýdanynyń or­ta­lyǵy Qarataý qalasynda Sho­rabek Aıdarovtyń 60 jasqa tolýyna oraı respýblıkalyq aıtys ótti. «Shoq tildi shaıyr – Shora­bek» atty bul jyr dodasyna eli­mizdiń túkpir-túkpirinen 20 aıty­sker qatysty. Talas jerin jyr­ǵa bólep, eldiń ezýine kúlki uıalatyp, eldi bir serpiltken bul dodanyń bas júldesine Aınur Tursynbaeva laıyq dep tanyldy. Bas júldegerge 1 mıllıon teńge tabys etildi. Birinshi orynǵa astanalyq Serikzat Dúısenǵazın, ekinshi orynǵa Almaty oblysynan kelgen Aıtaqyn Bulǵaqov, al úshinshi oryndarǵa jambyldyq Altynkúl Qasymbekova men shym­­­kent­­­tik Aqmaral Leýbaeva ıe boldy. Jambyl oblysy ákiminiń oryn­basary Erqanat Manjýov pen Talas aýdanynyń ákimi Bolat Rys­mendıev toı ıesin ar­naıy qut­tyqtap, at mingizdi. Já­ne aqynǵa «Talas aýdanynyń qur­metti azamaty» ataǵyn berdi. Al tarazdyq kásipker Qaırat qa­jy Momynov toı ıesine temir tul­pardyń kiltin tabys etti. Bul kúni shoq tildi Shorabektiń qushaǵy shoq gúlge tolyp, eń bastysy kóp­ten aıtysty saǵynyp qalǵan aǵaıyn bir jadyrap qaldy. Oralhan DÁÝIT, «Egemen Qazaqstan». Jambyl oblysy. Sýretterdi túsirgen Aqádil RYSMAHAN.