Astana men Almaty egiz uǵym

Alataý bókterindegi alyp shahar ege­men­diktiń kýási, táýelsizdiktiń tiregi. Eldigimizdiń irgesi qalanǵan meken. Táýelsizdik týraly deklarasııa qabyldanǵan qala da – Almaty. Elbasymyz aıtqandaı, «Almaty – qazaq memleketiniń altyn besigi». Kezinde el arasynda «Almaty – bas qa­lam, Astana – jas qalam», – degendi kóp estı­tin­biz. Jas qala deımiz-aý. Sol Sary­arqanyń sary belinde Qanjyǵaly qart Bógen­baı elinde ulan-baıtaq qazaq jeriniń qasıet­ti ortalyǵyndaǵy jas Astana – búgin­de Otanymyzdyń kúretamyryna qan júgi­r­tetin, sáýletti de, qýatty qalaǵa aınalǵanyn kóz kórip otyr. Tarıhqa kóz júgirtsek, 1994 jyly Qazaqstan Respýblıkasy Parlamentiniń otyrysynda Prezıdent Nursultan Nazarbaev Qazaqstannyń astanasyn Almatydan Aqmolaǵa kóshirý týraly usynys jasap, keıinnen 1997 jyly qazannyń 20-ynda astanany aýystyrý týraly Jarlyqqa qol qoıǵan bolatyn. 1998 jyly mamyrdyń 6-da Aqmola qalasynyń ataýy Astana bolyp ózgerdi. Sol bir tusta Astana qalasynyń bola­shaǵyna kúmánmen qaraǵandar bolmady emes, boldy. Alaıda, Memleket basshysy jasaǵan batyl sheshim el senimin aqtady. Az ýaqyttyń ishinde Elbasymyzdyń tól týyndysy Astana qalasy jańa bir mádenı-ǵylymı hám saıası-ekonomıkalyq alyp ortalyqqa aınaldy. Elorda álemge tanyldy jáne elimizdi álemge tanytty. Jer-jahannyń basshylary jıi bas qosatyn, EKSPO-2017 halyqaralyq kórmesi syndy álemdik is-sharalardy ótkizetin deńgeıge jetti. Almaty men Astana egiz uǵym. Biri Ala­taýdyń bókterindegi, al ekinshisi saıyn dala – Saryarqanyń tósinde kún sanap gúldenip, órkendep kele jatqan Qazaqstannyń serpin­di damýynyń jarqyn beıneleri ispettes. Bıyl eldigimizdiń nyshany, abyroı­ymyz­dyń aıǵaǵy sanalatyn Elordamyz 17-shi ret «týǵan kúnin» atap ótip otyr. Bul kúlli qazaqstandyqtar úshin ortaq mereke ekeni anyq. Janna DOSANOVA, Almaty qalasy Medeý aýdany ákimi apparatynyń mádenıet jáne tilderdi damytý bóliminiń basshysy. ALMATY.