Jaz qyzyǵy qyza tústi

О́tkende pedagogıka kolledjiniń qala syrtyndaǵy, erke Ertis jaǵasyndaǵy jazǵy demalys lageri № 8 jetim balalar úıine berilgeli jatqanyn estip edik. Aqyry sol sóz ras bolyp shyqty. Jetim kór­seń jebeı júr demekshi, bul ońdy sharýa boldy. Sonyń nátıjesinde, mundaǵy jetkinshekterdiń arqasy bir keńip qaldy. Búginde atalǵan balalar úıinde júzden astam jetkinshek memleket qam­qor­lyǵyna bólengen. Olarǵa munda barlyq jaǵdaı jasalǵan dese de bo­lady. Sol sebepten de balalar úı­inde tárbıelenýshiler esh alańsyz bilim nárimen sýsyndaýda. Onyń syrtynda olardyń ónermen, sport­pen shuǵyl­da­nýyna da múmkindik mol. Osyndaı qamqorlyq nátı­je­sinde balalar úıiniń túlekteri túrli óner saıystary men sport jarys­tarynda, qalalyq jáne oblystyq olımpıadalarda jaryp shyǵyp, jeńimpaz atanyp keledi desek, bı­ylǵy túlekterdiń bar­shasy joǵary bilim alýǵa talpynyp otyrǵan kórinedi. Onyń ishinde áskerı oqý oryndaryna túsýge tilek bildirip otyrǵandar da joq emes. – Qala syrtyndaǵy demalys la­gerinde seksen oqýshymyz  alań­syz dema­lýda, – deıdi balalar úıiniń dırektory Serjan Oqasov, – olar munda baqandaı eki aı dem almaq. Al bul az ýaqyt emes. Sondyqtan oqý­shy­lardyń jazǵy dema­lysyn kóńildi ótkizýleri úshin barlyq jaǵdaıdy ja­saýǵa tyrysyp baǵýdamyz. Munyń syrtynda 20 oqýshymyz kórikti Katonqaraǵaı óńirine saıahat shegip qaıtty. Qysqasy, bizdegi ár oqýshy jazǵy qamqorlyqtan tys qalmaq emes. Balalar úıiniń dırektory solaı deı kelip, ózderine qashanda qolushyn berip kele jatqan demeýshiler esimin ataı ketýdi de umytpaǵan. Osy oraıda, ol birinshi kezekte pedago­gıka kolledjiniń basshy­ly­ǵyna alǵys bildirgen. Al odan keıingi jer­de Ǵ.Ibraev, R.Shi­l­debaev, T.Man­surov syndy jáne basqa kásipk­er­lerdiń esimderi qurmetpen atalǵan. Bizdi basqasy basqa, dırektor myr­zanyń óz túlekteriniń aldaǵy taǵ­dyryna da alańdaıtyny súı­sindir­gen. Nesıe­men oqý bitirgen túlek­terimiz bas­panamen birden qamta­masyz etilýi tıis. Men sol úshin kúresýdemin deıdi ol. Dáýlet SEISENULY. Semeı.