ÝEFA Chernogorııa men Reseı máselesin 8 sáýirde qaraıdy

ASTANA. 3 sáýir. Fýtboldan 2016 jylǵy Eýropa chempıonatyna irikteý týrnıri aıasynda ótken Chernogorııa men Reseı arasyndaǵy oıynnyń aıaqsyz qalǵany belgili. Jankúıerlerdiń jappaı tártipsizdigine baılanysty 66-mınýtta toqtaǵan matchtyń máselesin ÝEFA 8 sáýirde qaraıtyn boldy. Bul týraly uefa.com habarlady. Negizi ÝEFA atalǵan is boıynsha tergeý jumystaryn 30 naýryzda bastap ketti. Fýtbol mamandary oıynnyń toqtatylýyna eki komandanyń da jankúıerleri kináli ekenin aıtýda. Sebebi, alańǵa ártúrli zattardy tek Chernogorııanyń emes, sondaı-aq, Reseıdiń de jankúıerleri laqtyrǵan. Osy jaıtty eskerip, ÝEFA qos tarapty da jazalaýy múmkin. Aıta keteıik, 27 naýryzda 2016 jylǵy Eýropa chempıonatyna irikteý týrnıri aıasynda komandalar bir-birine qarsy alańǵa shyqty. Chernogorııanyń Podgorısa qalasynda ótken oıyn alǵashqy mınýtta-aq toqtatylǵany esimizde. Sebebi, jergilikti jankúıerlerdiń biri Reseı qaqpashysy Igor Akınfeevke pırotehnıkalyq qural laqtyrǵan edi. Saldarynan oıynshy jaraqat alyp, alańnan ketýge májbúr boldy. 35 mınýttan keıin qaıta jalǵasqan match 66-mınýtta birjola toqtatyldy. Buǵan jankúıerlerdiń alańǵa oıynǵa kedergi keltiretin zattardyń tolassyz laqtyrýy sebep boldy. Atalǵan kezdesýge germanııalyq tóreshi Denız Aıtekın qazylyq jasaǵanyn aıta keteıik. Elaman Qońyr. Derek: uefa.com. Sýret: ria.ru.