Fýtboldan el chempıonatynyń ekinshi týry ótti

ASTANA. 11 naýryz. Búgin fýtboldan Qazaqstan premer-lıgasynyń ekinshi týr oıyndary ótti. Alty oıynnyń tórteýinde jeńimpaz anyqtalsa, qalǵan eki básekede esep ashylǵan joq. Ekinshi týrda barlyǵy 8 ǵana gol soǵyldy. Eki oıynnan keıin upaı joǵaltpaǵan bir ǵana komanda qaldy. Iаǵnı, «Astanadan» basqasynyń barlyǵy ekinshi týrdan-aq súrine bastady. Bul týraly egemen.kz habarlady. Týrdyń basty tartysyna eki birdeı oıyn laıyq boldy. Onyń biri Pavlodarda ótken jergilikti «Ertis» pen «Astana» arasyndaǵy oıyn bolsa, ekinshisi, Aqtóbedegi «Aqtóbe» men «Qaırattyń» teketiresi. Pavlodardaǵy oıynda alań ıeleri el chempıondaryna esh qarsylyq kórsete almady. Ekinshi maýsym qatarynan chempıon atanýdy kózdeıtin elordalyqtardyń ázirge qarqyny jaman emes. Ásirese, Roher Kanıas pen Patrık Tvýmasıdiń tasy órge domalap tur. Eki oıyn qatarynan nátıjeli soqqy jasaǵan bul fýtbolshylar ázirge mergender kóshinde aldyńǵy orynda. «Astananyń» bıyl Chempıondar lıgasynyń irikteý synynda el namysyn qorǵaıtyny belgili. Sol kezde de qos oıynshynyń asyǵy dál osylaı alshysynan tússin dep tileıik. Bul oıynda elimizdiń bes dúrkin chempıondaryn aıamaǵan «Astana» «Ertistiń» qaqpasyna jaýapsyz úsh dop soǵyp, iri eseppen jeńiske jetti. Aqtóbedegi oıynǵa keler bolsaq, eki komanda naǵyz alyptardyń aıqasyna tán óner kórsetti. Negizi mamandar men jankúıerler oıyn aldynda basymdyqty alań ıelerine berip, ««Aqtóbeniń» múmkindigi joǵary» degen pikir aıtqan edi. Degenmen, oıyn barysynda «Qaırattyń» qaýqary qarsylasynan esh kem túspedi. Itjyǵyspen ótken tartysta qarsylastar bir-biriniń osal tusyn taba almady. «Aqtóbe» osymen ekinshi ret teń nátıje kórsetip otyr. Alǵashqy týrda «Atyraýdy» qabyldaǵan aqtóbelikter 1:1 esebin mise tutqan edi. Al «Qaırattyń» 1-týrda óz alańynda iri eseppen (4:0) «Tobyldy» tas-talqan etkenin bilemiz. Bul týrda jankúıerler nazaryn aýdarǵan taǵy bir oıyn Qaraǵandyda ótti. Shymkenttiń «Ordabasyn» qabyldaǵan «kenshiler» 0:1 esebimen ese jiberdi. Bul oıynǵa «Ordabasyn» Vıktor Kýmykov bastap kelgeni belgili. Maýsymaralyq úziliste Shymkentke qonys aýdarǵan Kýmykov osyǵan deıin «Shahtermen» el fýtbolyndaǵy eń bıik belesterdi baǵyndyrǵany esimizde. Ekinshi týrdyń qorytyndysy mynadaı: «Ertis» (Pavlodar) – «Astana» – 0:3. Goldar: R.Kanıas 15 (p), P.Tvýması 49, N.Maksımovıch 56. «Aqtóbe» – «Qaırat (Almaty) – 0:0. «Atyraý» – «Taraz» – 2:1. Goldar: M.Trıfýnovıch 27, M.Baıjanov 90 – J.Golıch 6. «Shahter» (Qaraǵandy) – «Ordabasy» (Shymkent) – 0:1. Gol: E.Tuńǵyshbaev 83. «Oqjetpes» (Kókshetaý) – «Qaısar» (Qyzylorda) – 1:0. Gol: L.Rotkovıch 88. «Jetisý» (Taldyqorǵan) – «Tobyl» (Qostanaı) – 0:0. 3-týr oıyndary 15 naýryzda ótedi: «Astana» – «Shahter». «Qaırat» – «Jetisý». «Tobyl» – «Oqjetpes». «Qaısar» – «Ertis». «Ordabasy» – «Atyraý». «Taraz» – «Aqtóbe». Elaman Qońyr. Derek: egemen.kz. Sýret: vk.com.