ASTANA. 3 sáýir. Bendıden (dopty hokkeı) Reseıdiń Habarovsk qalasynda ótip jatqan álem chempıonatynda Qazaqstan quramasy qola júldege qol jetkizdi. Osymen otandyq bendıshiler álemdik dodada 6-ret úzdik úshtikten kórinip otyr. Bul týraly egemen.kz habarlady.
Úshinshi oryn úshin bolǵan tartysta Qazaqstan Fınlıandııamen oınady. Kezdesýdiń birinshi bóligin fınder 5:4 esebimen óz paıdalaryna aıaqtady. Degenmen, ekinshi taımda qazaqstandyqtar belsendilik tanytyp, qarsylastar qaqpasyn tórt márte dál kózdedi. О́z kezeginde, skandınavtyqtar tek bir golmen ǵana jaýap berýge múmkindik tapty. Nátıjesinde, Qazaqstan 8:6 esebimen jeńiske jetti.
Bul bizdiń komanda úshin álem chempıonatynyń altynshy qola júldesi. Sonyń sońǵy tórteýin qatarynan oljalaǵanyn aıta keteıik (2003, 2005 jáne 2012-2015 jj.).
Bıylǵy saıysta Qazaqstan «A» tobynda óner kórsetti. Toptyq kezeńdegi alǵashqy oıynyn aıdyn ıelerine qarsy ótkizgen bendıshilerimiz 1:10 esebimen ese jiberdi. Ekinshi oıynda Shvesııadan 4:9 esebimen jeńildik. Al úshinshi matchta Fınlıandııadan penaltı arqyly basym tústik (4:3).
Shırek fınalda Belarýs quramasyn 26:8 esebimen tas-talqan etip jeńgen Qazaqstannyń jartylaı fınalda taǵy da Reseımen joly túıisti. Bul joly da otandyq bendıshiler oısyraı jeńildi (1:14). Kelesi jartylaı fınaldyq jupta Fınlıandııa men Shvesııa kúsh synasyp, shvedter 10:1 esebimen jeńdi. Endi erteń Reseı men Shvesııa álem chempıony ataný úshin synǵa túsedi.
Bendıden álem chempıonaty 1957 jyldan bastap ótkizilip keledi. Ekinshi álemdik doda 4 jyldan keıin, ıaǵnı, 1961 jyly ótti. Al odan keıingi saıystar ár eki jyl saıyn uıymdastyrylyp keldi. 2003 jyly Halyqaralyq bendı federasııasy bul jarysty jyl saıyn ótkizý týraly sheshim shyǵardy. 2012 jylǵy álem chempıonaty Almaty qalasynda ótkenin aıta keteıik.
Elaman Qońyr.
Derek: egemen.ru.
Sýret: bandyvm2015.ru.
