Prezıdent Lıngvıstıkalyq komıssııa múshelerin tánti etti
Keshe Nursultan Nazarbaev Qazaqstan Respýblıkasynyń Prezıdentine kandıdat retinde memlekettik tilden synaq tapsyrdy. Bul úrdis el Konstıtýsııasynda bekitilgen tártipke sáıkes ótti. Qazaqstan Prezıdenti barlyq tapsyrmany sátti oryndady. Atap aıtqanda, Memleket basshysy «Bizdiń kúshimiz – birlikte» degen taqyrypta jazba jumysyn jazyp, Ilııas Esenberlınniń shyǵarmasynan úzindi oqydy, al aýyzsha áńgimede «Babalar sózi – danalyq kózi» taqyrybynda sóıledi. Lıngvıstıkalyq komıssııa qorytyndysy boıynsha Nursultan Nazarbaev memlekettik tildi erkin meńgergen dep tanyldy. Emtıhannan keıin BAQ ókilderine arnalǵan brıfıngte Lıngvıstıkalyq komıssııanyń tóraǵasy Myrzataı Joldasbekov osy sheshimderi týraly keńinen túsindirip ótti. «Jazba jumysy Nursultan Nazarbaev ózi tańdaǵan konvert boıynsha «Bizdiń kúshimiz – birlikte» degen taqyrypta boldy. Bul kisi Prezıdent bolǵaly beri memleketimizdiń týyn tuǵyrly etip, eldiń yntymaǵyn kóterip kele jatqan adam. Sol yntymaq-birliktiń arqasynda Qazaqstan 23 jyldyń ishinde osyndaı dárejege jetti. Osynyń bárin eki paraq qaǵazǵa óte keń, aýqymdy, syıymdy etip, taqyrypty óte ádemi asha bildi. Qate joq. Kandıdat osyndaı bolý kerek dep oılaımyn», – dedi M.Joldasbekov. «Ekinshi suraq boıynsha Ilııas Esenberlınniń prozasynan mátin berildi. Nursultan Ábishuly ony óte mánerlep oqyp shyqty. Úshinshi suraq «Babalar sózi – danalyq kózi» degen erkin taqyryp. Nurekeń ózi eshbir memlekettiń tarıhynda joq «Mádenı mura» degen úlken baǵdarlama júrgizgen adam. Onyń qoldaýymen 100 tomdyq «Babalar sózi» shyqqan. Elbasy osy kitaptardan óte jaqsy mysaldar keltirip, baıyrǵy babalarymyzdyń danalyǵynan, solardyń halyqqa beretin tárbıelik máni jóninde keń áńgime jasap berdi. Qosymsha suraqtar boıynsha kandıdat Abaıdyń qarasózderin aıtyp berdi. Qorytyndysynda komıssııa kandıdat N.Á.Nazarbaev qazaq tilin erkin meńgergen degen sheshim qabyldady», – dep túıdi M.Joldasbekov. «Nur Otan» partııasy atynan aldaǵy kezekten tys prezıdenttik saılaýǵa kandıdat retinde usynylǵan Nursultan Nazarbaevtyń memlekettik tilden tapsyrǵan emtıhanynan keıin Ortalyq saılaý komıssııasynyń Lıngvıstıkalyq komıssııa tóraǵasy Myrzataı Joldasbekov BAQ ókilderine sondaı-aq, Memleket basshysymen biraz máseleler jóninde aqyldasqanyn málim etti. «Emtıhannan keıin is basyndaǵy Prezıdent Nursultan Nazarbaevty búgingi «Nur Otan» seziniń aıaqtalýymen, sol sezde biraýyzdan aldaǵy saılaýǵa kandıdat retinde usynylýymen quttyqtadyq. 2011 jyly da osy lıngvıstıkalyq komıssııany basqarǵan edim. Emtıhannan keıin Prezıdent Nursultan Ábishulymen birqatar máseleler boıynsha áńgimelesip, aqyldastyq», – deı kele M.Joldasbekov aldaǵy ýaqytta prezıdenttikke kandıdattardan medısınalyq anyqtama talap etý týraly usynysyn aıtty. «Máselen, qarap otyrsaq, prezıdenttikke kandıdattar medısınalyq anyqtama tapsyrmaıdy. Biraq bul kezinde bolǵan ereje eken. Keıin, biraz halyqaralyq baqylaýshylar «adam quqyǵyn buzý» degen soń, bul bap alynyp qalǵan. Biraq, meniń oıymsha, prezıdentikke kandıdattar medısınalyq anyqtama tapsyrýy kerek. Sebebi, qazir mektepke barsańyz da, qyzmetke ornalassańyz da medısınalyq kitapsha mindetti túrde talap etiledi. El basqaratyn adam úshin Alladan aldymen suraıtynymyz osy densaýlyq. Sondyqtan, prezıdentikke kandıdat adam medısınalyq anyqtama tapsyrýy kerek degen usynys aıttym», – deıdi M.Joldasbekov. Sonymen qatar, áńgimelesý barysynda prezıdenttikke kandıdattardyń bilimi de sóz bolǵan. «Ekinshi bir másele, Konstıtýsııamyzda prezıdentikke kandıdat azamattyń bilimi týraly aıtylmaǵan. Baıaǵy zaman emes, bilim salasy damyǵan memleketpiz. Sondyqtan, múmkin bolsa, kelesi ýaqyttarda Qazaqstan Respýblıkasy prezıdenttigine kandıdat adamnyń bilimi mindetti túrde joǵary bolý kerek degen talap bolsa», – dedi M.Joldasbekov. «О́tken saılaýda da baıqadym, ózderińiz de kórip otyrsyzdar, saılaýǵa ylǵı ózin-ózi usynǵandar keledi. Qarsylyq joq, árıne, bul olardyń konstıtýsııalyq quqyǵy. Biraq kóptegen irgeli elderde saılaýǵa partııa usynysymen qatysady. Bizde de sondaı bolsa degen pikir aıttym. Taǵy bir aıtqym kelgeni, Nursultan Nazarbaev qazaq halqynyń aldynda talaı synnan ótken. Lıngvıstıkalyq komıssııa aldyna osymen tórtinshi ret kelip otyr eken. Jalpy, kandıdat bolatyn adam osy emtıhandy eki ret, ary ketse, úsh ret tapsyrsa degen usynys aıttym. Tildi erkin meńgergen azamat qaıta-qaıta tapsyra bere me degen oıymdy jetkizdim. Sizder jaqsy bilesizder, Nursultan Ábishulynyń qabiletine, memlekettik tildi erkin meńgergendigine eshqandaı kúmán joq», – dedi M.Joldasbekov. Dınara BITIKOVA, «Egemen Qazaqstan».
