Jyldar jemisi

Jaqynda Almatydaǵy Ulttyq kitaphananyń Kórmeler zalynda Mádenıet qaıratkeri, Halyqaralyq «Alash» ádebı syılyǵynyń laýreaty, fılologııa ǵylymdarynyń kandıdaty, belgili  aqyn  ári ádebıet zertteýshisi Ádilǵazy Qaıyrbekovtiń on tomdyq shyǵarmalar jınaǵynyń tusaýkeseri boldy. Ol QazMÝ-dyń fılologııa  fakýltetin bitirgen.  «Lenınshil jas»,  «Halyq keńesi»,  «Qazaq eli», «Shalqar» gazetterinde tilshi, bólim meńgerýshisi, bas redaktordyń birinshi orynbasary,  «Qazaq Ensıklopedııasy» Bas redaksııasynyń jetekshi mamany  bolyp qyzmet atqarǵan. 2000 jyldan beri – S.Muqanov pen Ǵ.Músirepovtiń memlekettik ádebı-memorıaldyq mýzeı kesheniniń dırektory. Kóptegen óleńderi «Eki myńjyldyq dala jyry» (2000), úsh  tomdyq qazirgi qazaq ádebıeti antologııasy (Máskeý, 2013), on tomdyq qazaq poezııasynyń antologııasy «Jyr marjany» (2014)  jınaqtaryna engen. On bes kitaby jaryq kórgen. Ádilǵazynyń aqyndyq talanty, zertteýshilik áleýeti, jýrnalıstik qarymy áriptesteriniń, qalyń oqyrmandarynyń árdaıym jiti nazarynda. Ol jurtshylyqqa birneshe qyrymen qatar tanylǵan qalamger. Bilim-biligi mol, isine tııanaqty, daryndy, tabandy, izdengish. Bul on tomdyqty ol óziniń 60 jyldyq mereıtoıymen oraılastyryp, demeýshiler kómegimen,  «TST Company» baspa kompanııa­synan shyǵarǵan eken. 1,2,3 – tomdarǵa – óleńderi, tolǵaýlary, balladalary men poemalary;  4-tomǵa – S.Muqanov pen Ǵ.Músirepovtiń  ómir joldary, shyǵarmashylyq qyrlary týraly jazylǵan esseler, ǵylymı-zertteý maqalalar, baıandamalar, oı-tolǵamdar; 5-tomǵa –  ádebıet, mádenıet, óner, ǵylym jáne qoǵamdyq-áleýmettik máselelerge qatysty jazylǵan maqalalar, 6-tomǵa – syr-suhbattar; 7-tomǵa – esseler, ádebı portretter, estelikter; 8-tomǵa – «Táýelsizdik jáne qazaq poezııasy» monografııasy, maqalalar; 9-tomǵa – áńgimeler, derekti áńgimeler, ocherkter, kúndelik, áriptester lebizi; 10-tomǵa – maqalalar jáne bıblıografııalyq kórsetkish (qurastyrǵan G.Qudabaeva) toptastyrylǵan. Kitaptyń tusaýkeserin Ulttyq kitaphananyń bas dırektory, Memlekettik syılyqtyń laýreaty, jazýshy Álibek Asqarov ashyp, júrgizip otyrdy. Qazaqstan Jazýshylar odaǵynyń basqarma tóraǵasy, senator N.Orazalınniń, Almaty qalasy ákiminiń orynbasary Z.Amanjolovanyń, Respýblıkalyq mádenıet, sport jáne aqparat qyzmetkerleriniń Almaty qalasy jáne Almaty oblysyndaǵy kásipodaqtary fılıalynyń tóraıymy Sáýle Naqypqyzynyń quttyqtaýlary tabystaldy. Aqyndar T.Medetbek, R.Nııazbek, Z.Tileýjanuly, Q.Begmanov, B.Jaqyp, M.Raıymbekuly, synshy Á.Meńdeke, jazýshy-jýrnalıster J.Kenjalın, Q.Túmenbaı, Q.Sársenbaı, M.Ahet, professor T.Tebegenuly, t.b. qatysyp, oı-pikirlerimen bólisti, tilekterin qosty. Qazaqstannyń eńbek sińirgen qaıratkeri, ánshi Erkin Shúkiman oryndaǵan «Án-ǵumyr» atty ánniń (sazy men sózi Á.Qaıyrbekovtiki)  de tabıǵaty tunyq. Osy is-shara aıasynda Ulttyq kitaphana qorynan avtordyń shyǵarmashylyǵyna arnalǵan kitap kórmesi uıymdastyryldy. Avtor on tomdyqtaryn qala kitaphanalaryna, mýzeılerge tapsyrdy. Qorǵanbek AMANJOL, «Egemen Qazaqstan». ALMATY.