Memlekettik komıssııa qurý qajet

2017 jyly – «Alash» ult-azattyq qozǵalysynyń 100 jyldyǵy, al odan bir jyl buryn, ıaǵnı 2016 jyly sol qozǵalystyń negizin qalaýshy jáne jetekshisi, Alashorda úkimetiniń tóraǵasy Álıhan Bókeıhannyń týǵanyna 150 jyl tolady. «Alash» ult-azattyq qozǵalysynyń qyzmeti, jalpy Alash ıdeıasy – qazaq qoǵamyn eýropalyq jolmen jańǵyrtýdy basty baǵyttarynyń biri retinde ustanǵanyn, sol zamandaǵy naqty jaǵdaılarǵa beıimdep, ulttyq memlekettilikti qalyptastyrýǵa umtylǵanyn jurtshylyq baıyptap keledi. Parıjdegi IýNESKO Atqarýshy keńesiniń bıylǵy jyly qarasha aıyna belgilengen osy uıymnyń Bas konferensııasynda qabyldaý úshin jibergen usynystarynyń ishinde 2016 jyly qoǵam jáne memleket qaıratkeri Álıhan Bókeıhannyń 150 jyldyǵyn IýNESKO kóleminde atap ótý jaıy qarastyryp otyrylǵany osynyń aıǵaǵy. Bul – Alash murasyn álemdik deńgeıge shyǵaryp nasıhattaýdyń taptyrmaıtyn múmkindigi týyp tur degen sóz. Munyń mańyzy Prezıdentimiz N.Á.Nazarbaevtyń bastamasymen Qazaq handyǵynyń 550 jyldyǵy atalyp ótken tusta tipti eselep arta túsedi. Elbasy jarııa etken «Máńgilik El» muraty da Alash jolyn elimizde de, halyqaralyq deńgeıde de zerdeleı tússek, baıandy bolatyny kúmánsiz. Elbasy óziniń «Tarıh tolqynynda» atty eńbeginiń «Alash murasy jáne osy zaman» atty taraýynda: «HH ǵasyrdyń basyndaǵy qazaq qoǵamynda zııaly qaýym qalyptasýynyń urpaqtar estafetasy sııaqty sıpaty bolǵanyn atap aıtqan abzal», dep kórsetken bolatyn. Sondyqtan da «Aq jol» partııasy Álıhan Bókeıhannyń 150 jyldyǵyn laıyqty deńgeıde ótkizý jónindegi Memlekettik komıssııa qurý qajet dep sanaıdy. Onyń negizgi maqsaty jáı ǵana toı toılaýmen emes, oı oılaýmen, artynan iz qalatyn, tanymdyq, taǵylymdyq turǵydan ultymyzdyń, memleketimizdiń rýhyn kóteretin, qoǵamdyq sanada silkinis týǵyzatyn mazmundy sharalardy iske asyrýdy qamtamasyz etý bolýy tıis. Azat PERÝAShEV, Májilis depýtaty.