Aqtóbelik ónim kórsetildi

Keshe Aqtóbege Investısııalar jáne damý mınıstri Áset Isekeshev jumys saparymen keldi. Mınıstr jumys saparyn óńirdegi Qazaqstannyń ındýstrııalandyrý kartasyna engen birden-bir iri nysan – «Qazhrom» TUK» AQ ferroqorytpa zaýytymen tanysýdan bastady. Jobanyń quny 843 mıllıon AQSh dollary turady, jyldyq qýaty 440 myń tonna joǵary sapaly ferrohrom óndirýge múmkindik beredi. Jobany paıdalanýǵa berýdiń nátıjesinde 290 jańa jumys orny ashyldy. Sodan keıin Áset Isekeshev oblys ákimi Berdibek Saparbaevtyń bastaýy­men «Tehnodom» JShS jáne Aqtóbe munaı qondyrǵylary zaýytynda bolyp, óndiristiń qazirgi tańdaǵy jaǵdaıymen tanysty. Mınıstrdiń kelesi barǵan nysany – Aqtóbe rels arqalyǵy zaýyty. Bul kásiporyn da Qazaqstannyń ındýstrııalandyrý kartasy aıasynda salynǵan. Onyń quny 82,7 mıllıard teńge turady. Zaýyt tolyq qýatyna shyqqanda jylyna 430 myń tonna ónim shyǵarady. Bárinen buryn munda joǵary jyldamdyqtaǵy magıs­traldarda paıdalanylatyn R65 markaly uzyndyǵy 120 metr termotózimdi relster shyǵarylady. Qalǵan 230 tonnasy sortty prokat temir ónimderi bolyp keledi. Nátıjesinde «Qazaqstan temir joly» AQ rels ónimderine degen suranysyn tolyq qamtamasyz etedi. Sondaı-aq, О́zbekstan, Ázerbaıjan, Túrikmenstan naryǵyna shyǵý da qarastyrylýda. Budan basqa zaýyt qurylys ındýstrııasynyń anaǵurlym ósip otyrǵan suranysyn da qamtamasyz etedi. Áset Isekeshev, Berdibek Saparbaev, sondaı-aq, «Qazaqstan temir joly» AQ prezıdenti Asqar Mamın, «Siemens S.p.A» kompanııasynyń bas dırektory Djýzeppa Ferrarıo, Parlament depýtattary, memlekettik organdardyń, TMD jáne Baltyq elderi temirjol ákimshilikteriniń ókilderi zaýyttaǵy relstiń shyǵarylý úderisine qatysty. Saltanatty sátte «Aqtóbe rels arqalyǵy» zaýyty» JShS dırektory Andreı Kýzmın sharaǵa qatysýshylarǵa tehnologııalyq úderisti tereńirek áńgimeledi. – Elbasynyń tapsyrmasymen In­dýstrııalandyrý kartasy aıasynda qysqa merzimde Qazaqstanda jańa temir­jol mashınalaryn jasaý salasy quryldy. «General Electric», «Alstom», «Talgo», «Siemens» sııaqty álemdik kóshbasshy kompanııalarmen áriptestikte júk jáne jolaýshy teplovozy, elektrovoz, vagondar, iri vagondyq quımalar, qurylymnyń tehnıkalyq quraldary óndirisi boıynsha jańa zaýyttar   iske qosyldy, – dedi «Qazaqstan temir joly» AQ prezıdenti Asqar Mamın. Aqtóbe rels arqalyǵy zaýytynda Qazaqstandaǵy temirjol mashınalaryn jasaýdy damytý jáne halyqaralyq yntymaqtastyqqa arnalǵan dóńgelek ústel boldy. Talqylaý barysynda «TulparTalgo», «Elektrovoz qurastyrý zaýyty» «Lokomotıv qurastyrý zaýyty» sııaqty temirjol ónimderin shyǵa­ratyn kásiporyndardyń jáne «Qazaq­stan damý banki» AQ qoldaýynyń eksport­tyq tetikteriniń tusaýkeseri boldy. Dóń­gelek ústel aıasynda Aqtóbe rels arqa­lyǵy zaýytynyń daıyn ónimderin jetki­zýge Ázerbaıjan, Belorýssııa, Grýzııa, О́zbekstan, Tájikstan jáne Qyrǵyz­stan temirjol ákimshilikterimen ynty­maq­tas­tyq týraly memorandýmǵa qol qoıyldy. Áset Isekeshev jáne oblys ákimi Berdibek Saparbaev bastaǵan top ındýstrııalyq aımaqqa bardy. Munda ónerkásip óndirisi jáne 2015 -2019 jyldary údemeli ındýstrııalyq-ınnovasııalyq damýdyń memlekettik baǵdarlamasyn júzege asyrý máseleleri boıynsha kóshpeli jıyn ótti. Jıynda oblys ákiminiń orynbasary Ǵalı Esqalıev elimizdiń Indýstrııalandyrý kartasyna óńirden jalpy somasy 799,9 mln. teńge bolatyn 12,8 myń jumys orny ashylatyndaı 91 ınvestısııalyq joba engizilgenin tilge tıek etti. Onyń aıtýynsha, údemeli ındýstrııalyq-ınnovasııalyq damý baǵdarlamasynyń alǵashqy besjyldyǵynda jalpy quny 552,6 mıllıard teńge bolatyn 71 joba iske qosylyp, 6,6 myń jańa jumys orny ashylǵan. Indýstrııalandyrý kartasynyń ekinshi besjyldyǵynda jalpy somasy 247,3 mıllıard teńge turatyn, 6,2 myń jumys orny ashylatyn 20 joba júzege asyrylýda. Bıylǵy jyly jalpy somasy 9,4 mıllıard teńge turatyn, 689 jumys ornyn ashýǵa múmkindik beretin 8 ınvestısııalyq joba júzege asyrylýda. Kóshpeli jıynda ınvestısııalyq jobalardy júzege asyrý barysynda qol baılaý bolyp otyrǵan keıbir máseleler de ortaǵa salyndy. Satybaldy SÁÝIRBAI, «Egemen Qazaqstan». Aqtóbe oblysy.