Mádına men Jamal

kıim úlgilerimen tańǵaldyrmaq Oblys ortalyǵyndaǵy Sultanmahmut Toraıǵyrov atyndaǵy memlekettik ýnıversıtettiń Dızaın, teatr jáne sýret óneri fakýltetiniń stýdentteri Jamal Qalıeva men Mádına Qasqyrbaeva T.Júrgenov atyndaǵy Qazaq ulttyq óner akademııasynda ótken elimizdiń joǵary oqý oryndary stýdentteri arasyndaǵy «Dızaınerler» baıqaýynyń dıplomanttary atandy. Bul baıqaýǵa stýdent qyz­dar zamanaýı kıim úlgilerin aparyp dızaın salasy boıynsha ózderiniń shyǵarmashylyq ıdeıalaryn usyndy. Iаǵnı, baıqaý sharty boıynsha Jamal men Mádına kıim eskızderin syzyp, ony piship, tigip shyqty. Al, qazylar alqasy barlyq qatysýshylardyń jasaǵan kıimderiniń jańashyldyǵy men dızaınerlik oılaý qabiletiniń ereksheligine, jumysty oryn­daýdaǵy sapa men uqyp­ty­lyqqa, kompozısııalyq já­ne tústerdiń úılesimdiligin utymdy qoldana bilgenderin atap ótti. Sultanmahmut Tor­aıǵyrov atyndaǵy ýnıversıtet stýdentteri Jamal Qalıeva men Mádına Qasqyr­baevanyń jumystaryna arnaıy sertıfıkat tabys etil­di. Isker stýdent Jamal bul tabys olardyń dızaıner mamandyǵyn tańdaýdaǵy al­ǵashqy jeńisteri jáne tynymsyz shyǵarmashylyq eń­bektiń, oıdyń arqasy deıdi. Dızaıner mamandyǵyn qazaq jastary endi-endi tańdap, úırenip kele jatqanymen,onyń negizi tereńde – bizdiń apa-ájelerimizdiń qoldarynan shyqqan qazaq kıimderi, oıýlar, quraq kórpeler – oıdan, sheberlikten týǵan. Sondyqtan, qazirgi zaman tilimen aıtqanda, búgingi kúnniń dızaıneri, ıaǵnı kıim úlgilerin jasaýshy adamǵa aldymen daryn, qabilet jáne kreatıvti erekshe oılaý múmkindigi qajet. – Qazir bizdiń oıymyzda osy kúngi ómirdiń kreatıvtiligi men zamanaýılyǵyn beıne­leıtin kıim úlgilerin jasaý ıdeıasy bar. Biz ulttyq qundylyqtarymyzdy álemge pash etetin tańqalarlyq kıim úlgilerin jasaǵymyz keledi, – deıdi Jamal men Mádına. – Árıne, stýdentterimizge úıretý, oqytý – bizdiń paryzy­myz. Qyzdarymdy Almatyǵa baı­qaýǵa jibergende olardyń da­­ryndy qabiletterine sendim,  – deıdi ustazdary, Qazaqstan Sýret­shiler odaǵynyń múshesi Maısa Yqylasova. Farıda BYQAI, «Egemen Qazaqstan». PAVLODAR.