ALMATY
Qazaqstan Eýropadaǵy qaýipsizdik jáne yntymaqtastyq uıymynyń is basyndaǵy tóraǵasy retinde Qyrǵyzstandaǵy jaǵdaıdy tez arada qalpyna keltirý úshin qajetti sharalardy qolǵa alyp, kómek qolyn sozýda. Sonymen qatar kórshiles týys memleket retinde onyń ekonomıkasyn barynsha qysqa merzimde qalpyna keltirý maqsatynda birqatar jumystar atqarylýda. Oǵan Memleket basshysy Nursultan Nazarbaevtyń qıyn da kúrdeli jaǵdaıǵa tap bolǵan Qyrǵyz Respýblıkasyn osyndaı kezeńde qoldaý úshin arnaýly gýmanıtarlyq qor qurý týraly usynysy aıqyn dálel bola alady.
Elbasy búgingi kún tártibinde turǵan mundaı mańyzdy másele jóninde jaqynda Almatyda ótken EQYU syrtqy ister mınıstrleriniń beıresmı kezdesýinde atap aıtqan bolatyn. Soǵan oraı Qazaqstan Úkimeti kórshiles Qyrǵyz Respýblıkasyna gýmanıtarlyq kómek kórsetý týraly sheshim qabyldap, 11 mıllıon AQSh dollaryna jýyq qarajat bóldi.
QR Tótenshe jaǵdaılar mınıstri V.Bojkonyń aıtýynsha, Úkimettiń osy qaýlysy aıasynda qyrǵyz aǵaıyndarǵa kóp mólsherdegi túrli taýarlar jiberý josparlanyp otyr. Turmysqa asa qajet bul taýarlardyń arasynda jylý elektr stansasyn shıkizatpen qamtamasyz etý úshin kómir, qurylys materıaldary – aǵash, metall prokaty, shatyrǵa arnalǵan materıaldar jáne árıne óte mol kólemdegi azyq-túlik te bar. Tótenshe jaǵdaılar mınıstrliginiń osyndaı uıǵarymyn oryndaý maqsatynda Memlekettik materıaldyq rezerv boıynsha komıtet respýblıkalyq memlekettik “Rezerv” kásipornyna joǵaryda kórsetilgen bul taýarlardy memlekettik materıaldyq rezerv qorynan shyǵarýdy buıyrǵan bolatyn.
“Búginde “Rezerv” respýblıkalyq memlekettik kásipornynyń Almaty fılıaly Qyrǵyzstanǵa aýqymdy kólemdegi kúrishti arnaýly júk máshınelerine tıep jiberýde”, deıdi fılıal dırektory Beıbit Ibrashuly óz oıyn ortaǵa salyp. Anyǵyraq aıtqanda, keleshekte 47 vagonnan turatyn temirjol quramyn jiberý josparlanýda. Al munyń, ıaǵnı júktiń aýqymy óte úlken bolǵandyqtan ony jóneltý Tótenshe jaǵdaılar mınıstri V.Bojkonyń baqylaýynda bolmaq.
Sondaı-aq, mınıstrdiń tikeleı tapsyrmasy boıynsha Tótenshe jaǵdaılardyń Almaty garnızonynyń qosymsha quramy da iske qosylady. Júk tıeýge arnalǵan vagondardy “Qazaqstan temir joly” UK-nyń Almaty temir jol basqarmasy shuǵyl túrde usynbaq. Sonymen, Qyrǵyzstanǵa Qazaqstan halqynyń kómegi ýaqytynda jetkiziletindigine senim mol.
Baqyt BALǴARINA.
* * *
SEMEI Birine-biri jalǵasqan saıası dúrbeleń men aǵaıynaralyq janjaldardyń saldarynan búginde ekonomıkalyq jáne áleýmettik jaǵdaıy tyǵyryqqa tirelip otyrǵan Qyrǵyz Respýblıkasyna bizdiń memleketimiz tarapynan materıaldyq turǵyda on mıllıonnan asa AQSh dollary kóleminde kómek kórsetiletini belgili. Soǵan oraı jýyrda Qyrǵyz eline attandyrýǵa Semeıden 4 vagon qurylys jáne sharýashylyq taýarlary tıeldi. Munyń basym bóligi osynda óndirilgen qurylys materıaldary. Sonyń ishinde Semeı shıferiniń orny bólek. Munyń syrtynda aǵaıyndarǵa arnalǵan sálemdeme quramynda túrli azyq-túlik bar. – Mundaı sálemdemeler respýblıka boıynsha bir jerge jınaqtalyp, sonsoń tıisti jerge jóneltiletin bolady. Biraq bul ıgilikti iste esh kidiris bolmaıtyndyǵyna senimdimiz, – deıdi “Balqash” respýblıkalyq mekemesiniń osyndaǵy fılıalynyń basshysy Nurbek Saǵadıev. Sóz sońynda mundaı kómek elimizdiń memlekettik materıaldyq rezervinen jasalyp otyrǵanyn aıta ketkenimiz jón bolar. Tóskeıde maly, tósekte basy qosylyp jatqan qyrǵyz aǵaıyndarǵa kómek osylaısha óz jalǵasyn tabýda. Dáýlet SEISENULY.
