Sarbazdar qalalyq saıabaqty kórkeıtýde

Qoldaryna qural-saımandaryn alǵan “Jasyl el” sarbazdary ekinshi saıabaqta taza­lyq jumystaryn júrgizýde. Olarǵa bas-kóz bo­lyp júrgen jetekshileri Ásııa Eselbaeva men Natalıa Kolesnıkova jáne Klara Faı­zýl­lına. Saıabaqty kórkeıtýge Jaıaý Musa kol­ledjiniń 23 stýdenti jumyldyrylǵan. Olar­dyń ishinde Úshterek, Belovka aýyldary men Aqsý kentinen kelip jumys isteıtinder de bar. Sondyqtan ýaqytty tıimdi paıdalaný maq­satynda jasyleldikter túski asty saıabaqta ishedi. – Búgingi kúni qalada turatyn balalar da aýyl sharýashylyǵy eńbek quraldarymen ju­mys isteýdi úırenip, shóp shaýyp, kepken aǵash­tardy kesýge daǵdylandy. “Jasyl el” baǵ­dar­lamasy jastardy eńbekke baýlı otyryp, olardyń otanshyldyq sezimin oıatý, jas urpaq­ty ekologııalyq tárbıege úndeý baǵytynda zor áserin tıgizedi. Demalys saıabaǵynda jumys istegen kezde qural-saımandardy saqtaýǵa saıa­baq ákimshiligi men balalar shyǵarmashylyǵy úıi kómek berdi. Sondaı-aq, stýdentterge qural-saımandardy qaırap, keńpeıildik ta­nytqan “Nur-Aqsý” páter ıeleri koopera­tı­vi­niń tóraǵasy Nıkolaı Zastavskııge alǵy­symyzdy bildiremiz, – deıdi Ásııa Eselbaeva. Qalanyń ajarlanyp, kórkeıe túsýine selqos qaramaıtyn jastar búgingi kúni qolaramen kepken butalar men aǵashtardy kesip, shalǵymen shóp shabýǵa kirisken. Sondaı-aq, qalyń bitken aram shópterdi julyp, qapshyqtarǵa salyp, tazalaýda. – Men Belovka kentinde turamyn. “Jasyl el” sarbazdary qatarynda jumys isteıtinime óte qýanyshtymyn. Bul baǵdarlama arqyly qalany kóriktendirip, tazalyq jumystaryn júrgizýmen qatar, jastar tájirıbe jınaqtap, óz eńbegimen qarjy tabý múmkindigine ıe bolady, – deıdi quqyqtaný fakýltetiniń 3-kýrs stýdenti Zarına Qaısarına. Aqbota SEISENBAEVA. Pavlodar oblysy, Aqsý qalasy.