Kórermenniń kóńilin kótergen

Elorda kúni merekesiniń kórkin qyzdyrýǵa, sóıtip, qala turǵyndary men jan-jaqtan kelgen qonaqtardyń kóńilin kóterýge úrmeli aspaptar orkestrleri de atsalysyp keledi. Keshe jyl saıyn ótkizý dástúrge aınalǵan «Astana samaly» halyqaralyq úrmeli orkestrlerdiń VI festıvali bastaý aldy. Astana kúnine oraılastyrylyp ótkiziletin atalǵan shara bıyl da jurtshylyq nazaryn ózine aýdardy. Aýa raıynyń salqyndaý bolǵanyna qaramastan, úrmeli orkestrlerdiń ónerlerin tamashalaý úshin kelýshilerdiń aıaǵy saıabyrsı qoıǵan joq. Aldymen qala turǵyndary men qonaq­tarynyń aldyna Memleket­tik kúzet qyzmetiniń Prezıdenttik úrmeli aspaptar orkestri shyqty. Prezıdenttik úrmeli orkestrdiń bastyǵy podpolkovnık Tilek Erǵalıevtiń dırıjerlik etýimen úrmeli aspaptardyń yrǵaǵy qoldaǵy qarýlardyń únimen úndesip jatty. Tarsyldaǵan bara­bandardyń dybysy men sart-surt etken qarýlardyń úni jarasymdy-aq kórindi. Sońynan áýege qaraı oq atylyp, kórermenderdi bir serpiltip tastady. Budan keıin ortaǵa maıor Alekseı Tereshenkonyń dırı­jerligimen Ulttyq ulannyń ortalyq úrmeli aspaptar orkestri (Astana qalasy) shyqty. Orkestr negizinen oınaqy mánerdegi shyǵarmalardy oryndap, kóńildi aýan qalyptastyrdy. Artynsha alań tórinde qyzyl gýsarlyq áskerı kıingen Omby qalasy fılarmonııasynyń úrmeli aspaptar orkestri kórinip, óz ónerlerin pash etti. Orkestrdiń kórkemdik jetekshisi ári dırıjeri Oleg Rojanov bastaǵan top qımylǵa kóbirek erik berip, jınalǵan jurtshylyqty eliktirip áketti. Atalǵan orkestr alańdy bosatar sátte dý qol shapalaqtalyp, orkestrdiń óneri joǵary baǵa­landy. Shynynda da, bul kez kon­serttiń naǵyz qyzǵan kezi edi. Kelesi bolyp alańǵa shyqqan Dar­han Raqymǵalıev dırıjerlik etken Ulttyq ulan áskerı ınstı­týtynyń úrmeli aspaptar orkestri (Petropavl qalasy) kórermenge shattyq kóńil kúı syılady. Úrmeli aspaptardyń súıemeldeýimen dombyra úni kókti sharlady. Sońynan konsertti Astana qalasy ákimdiginiń Memlekettik akademııalyq fılarmonııasy úrmeli aspaptar orkestri jal­ǵas­tyrdy. Erekshe mánerde kıingen úrmeli orkestrdiń is-qımyl­daryn bıshi qyzdar qoldap, erekshe ózindik saryn kórsete bildi. Osylaısha, birinen biri asqan óner ujymdary kópshilikke merekelik kóńil kúı syılap, bir qýantyp tastady. Uıymdastyrý jumystarymen júrgen Astana qalasy ákimdiginiń Memlekettik akademııalyq fılarmonııasy uıym­dastyrý bóliminiń jetek­shisi O.Rysmaǵanbetovpen sóıles­ken kezimizde ol jyl saıyn kelý­shilerdiń qataryn jańartyp otyramyz degendi basa aıtty. Onyń sózine qaraǵanda, atalǵan shara 4-6 shilde aralyǵynda jalǵasady. «Tańerteńgisin shara qalalyq ákimdik aldyndaǵy alańda plas-konsert túrinde ótse, tústen teıin úrmeli orkestrler óz ónerlerin qala saıabaqtarynda jalǵastyryp, al keshkisin bend-marafon túrinde «Báıterek» aldyndaǵy alańda kópshilik kóńilin kóteretin bolady. Festıval kelesi kúni paradpen Kartına galereıasynan Jastar saraıyna deıin aralyqty júrip ótip, festıvaldiń resmı jabylýy sonda oryn alady», dedi Oral Erbosynuly. Festıvaldiń ótýine muryndyq bolǵan Astana qalalyq ákimdigi bolsa, al uıymdastyrý Astana qalasy ákimdiginiń Memlekettik akademııalyq fılarmonııasyna júktelipti. Asqar TURAPBAIULY, «Egemen Qazaqstan».