Monopodyńyz bolsa, mýzeıdiń mańyna jolaı almaısyz

ASTANA. 12 naýryz. Fransııadaǵy ataqty Versal saraıy men Brıtanııa ulttyq galereıasy «selfı taıaqshasy» atalyp ketken sýretke túsirý qurylǵysyna (monopod) tyıym saldy. Bul týraly gazeta.ru habarlady. Bul taıaqshaǵa osyǵan deıin álemdegi birneshe mýzeıler men tarıhı oryndar tyıym salǵan bolatyn. Atap aıtsaq, Nıý-Iorktegi Kýper-Hıýıtt dızaın mýzeıi, Qazirgi zamanǵy óner mýzeıi jáne taǵy basqa birneshe mádenı oryndar monopodpen kirýge ruqsat bermeıtin sheshim shyǵardy. Tipti bulardyń qataryna jýyrda AQSh-taǵy Metropolıten mýzeıi de qosylýy ábden múmkin. Sebebi, atalǵan mádenı oshaq osy máselege erekshe mán berýde. Sondaı-aq, Londondaǵy birneshe oryndar da qolyńyzda monopodyńyz bolsa, mańyna jolatpaıdy. Endi mine, osy qatarǵa Versal saraıy men Brıtanııa ulttyq galereıasy qosyldy. Mýzeı qyzmetkerleriniń aıtýynsha, monopodqa tyıym salý kóne jádigerlerdiń qaýipsizdigi úshin qolǵa alynǵan dúnıe. Sebebi, taıaqshamen mýzeıdegi jádigerlerdi abaısyzda qulatyp nemese basqalaı zııan keltirýi ábden múmkin. Tipti Nıý-Iorktegi mýzeılerde mundaı jaıttar tirkelip, birneshe qundy dúnıege zaqym kelgen. Sondyqtan mýzeı ákimshilikteri osyndaı saqtyq sharasyna barýǵa májbúr. Búginde mýzeı turmaq, monopodqa Anglııadaǵy fýtbol stadıondary da qarsy shyǵýda. Tipti aǵylshyn premer-lıgasynda oıyndaryna «selfı taıaqshasymen» kire almaısyz. Stadıonǵa álgindeı taıaqshamen kelýge tyıym salýda jankúıerler arasyndaǵy qaqtyǵysta qarý retinde qoldanbaý maqsaty kózdelgen. Al ol jaqta mundaı qaqtyǵystyń tańsyq emesi belgili. Sonymen qatar, tennısten Avstralııa ashyq birinshiligin uıymdastyrýshylar da oıynǵa monopodsyz kirgizedi. «Selfı taıaqshasynyń» tarıhy 1983 jyldan bastaý alǵanymen, sońǵy eki jyldyń ishinde aıasy keńeıip, qoldanýshylar sany mıllıondap ósti. Tipti, 2014 jyly eń ótimdi taýarlardyń qatarynda osy taıaqshanyń bolǵanyn aıta keteıik. Elaman Qońyr. Derek: gazeta.ru. Sýret: positime.ru.