Tehnoparkterdi qoldaýdyń qolaıly joly

Keshe Astana qalasyndaǵy “Astanalyq” bıznes ortalyǵynda aımaqtyq tehnoparkterdi damytý taqyryby boıynsha baspasóz máslıhaty ótkizildi. Ony  Indýstrııa jáne jańa tehnologııalar mınıstrligi Injınırıng jáne tehnologııalar transferti ortalyǵynyń atqarýshy dırektory Bolat Menshik, ortalyqtyń strategııalyq josparlaý departamentiniń dırektory О́mirjan Táshimov jáne “Ulttyq ınnovasııalyq qor” AQ basqarmasy tóraǵasynyń orynbasary Ánýarbek Sultanǵazın júrgizdi. Búgingi tańda Injınırıng jáne teh­no­logııalar transferti ortalyǵyna qaras­ty ınnovasııalyq damý ınstıtýtyndaǵy jańa qyzmet kórsetý túri – tehnologııa­lyq bıznes-ınkýbatorlar tóńiregindegi jumystar birtindep qarqyn alyp keledi. Memleket basshysynyń tikeleı bastama­symen qolǵa alynyp otyrǵan bul maq­satty jumystar eń aldymen osy salada elimiz aımaqtaryn kóterýge baǵyttalǵan. Sol sebepti ol oblystardaǵy tehnolo­gııalyq parkter bazasynda júzege asyrylady. Joǵaryda atalǵan ortalyqtyń qatysýymen qazirge deıin respýblıkanyń 8 aımaǵynda tehnoparkter qurylyp úlgergen. Olar Astana, Almaty, Shymkent, Oral, О́skemen jáne Petropavl qala­larynda ornalasqan. Osy tehnoparkter qurylǵaly beri 149 ınnovasııalyq joba qabyldanypty. Onyń ishinde 3 joba memleket tarapynan qoldaýǵa ıe bolyp, tıisinshe qarjy alǵan. Ádette aımaqtyq tehnoparkterdi damytý degen uǵymnyń sheńberine shaǵyn ınnovasııalyq kásiporyndardy qoldaýǵa baǵyttalǵan tehnıkalyq bıznes-ınkýbatorlar da kiredi. Sondyqtan bıylǵy jyly qabyldanǵan 2010-2014 jyldarǵa arnalǵan údemeli ındýstrııalyq-ınnovasııalyq damý baǵdarlamasy aıasynda tehnıkalyq parkterdi qarjylandyrý da qarastyrylǵan. Sonyń ishinde ústimizdegi jyly tuńǵysh ret memleket tarapynan shaǵyn jáne orta ınnovasııalyq kompanııalar men jobalardy damytý maqsatynda tehnologııalyq bıznes-ınkýbatorlar qyzmetin kórsetý usynylyp otyr. Osy sharalarǵa 245 mln. teńge qarjy bólingen. Ol negizinen shaǵyn ınnovasııalyq kásiporyndardy qoldaý men jańa fırmalardy qurý sekildi jumystardy qamtıtyn bolady. Baspasóz máslıhatynda qazirgi tańda tehnologııalyq bıznes-ınkýbatorlarǵa 64 joba túsip otyrǵany aıtyldy. Olar ekonomıkanyń 7 sektory boıynsha taldanyp jasalǵan. Jyl sońyna deıin bulardyń keminde 30-y iriktelip, qarjylandyrý júzege asyrylady. “Ulttyq ınnovasııalyq qor” AQ pılottyq joba retinde qabyldanyp otyrǵan bul bıznes-bastamalardyń bastapqy kezinde aıaǵynan tik turyp ketýleri úshin barynsha kómek kórsetedi. Keıin tájirıbe jınaqtap, kelesi kezeńge kóshken kezinde naryqtyq qatynastarǵa erkin qosylyp ketýleriniń de múmkindigin jasaıdy. Olaı bolsa, qazirgi tańda tehnıkalyq bıznes-ınkýbatorlardy kótermeleý tehnoparkterdi qoldaýdyń eń qolaıly joly bolyp otyr. Serik PIRNAZAR. ASTANA.