Qostanaıda aqbókender qyrylǵan aımaqtan belgisiz zat tabyldy

QOSTANAI. 23 mamyr. Qostanaı oblystyq prokýratýrasynda ótken baspasóz máslıhatynda basqarma bastyǵy Asqar Syzdyqov Amangeldi aýdanyndaǵy  aqbókender qyrylǵan aımaqtan shar sekildi domalaq zat tabylǵanyn málimdedi. Bul týraly ng.kz saıtyna silteme jasap, egemen.kz tilshisi habarlady. Prokýror Asqar Syzdyqov: «Shar sekildi zattyń tabylǵany ras. Dıametri 60 sm. Biraq saraptaý qorytyndysy kórsetkendeı, onda eshqandaı joǵary radıasııa baıqalmaǵan. Shar qazir Amankeldi aýdandyq ákimdigine jetkizildi. Bul ǵarysh kemesiniń bir bólshegi bolýy múmkin», – dedi. Máslıhat barysynda búginge deıin Amangeldi aýdanynda 40 myńnan asa ólekse jınalyp, joıylǵany belgili boldy. Tótenshe jaǵdaı saldaryn joıý jumystary áli jalǵasýda. Jergilikti turǵyndarǵa aqbókender qyrylǵan óńirge mal jaıýǵa ruqsat berilgen joq. Dala janýarynyń qyrylýyna baılanysty Amangeldi aýdandyq ishki ister bóliminde sotqa deıingi tekserý-tergeý jumystary júrgizilýde. Oqıǵa ornynda tótenshe jaǵdaılar departamentiniń jáne tabıǵat qorǵaý prokýratýrasynyń qyzmetkerleri jumys isteýde. Aldyn ala derekter boıynsha, bul apatqa pasterellez aýrýy sebep degen boljam aıtylýda. Qozǵalǵan qylmystyq istiń sheshimi synamalardy saraptaýshylardyń sońǵy qorytyndysyna baılanysty bolady. Asqar Syzdyqov jýrnalısterge ólekselerdiń qalaı joıylyp jatqandyǵyn aıtyp berdi. Sondaı-aq, ol «ólgen aqbókenderdiń múıizin kesip alyp jatyr» degen alyp-qashpa áńgimege qatysty túsinikteme berdi. Bul jóninde prokýror: «Ondaı áńgimelerdiń bar ekeni rs. Qazir jumys istep jatqan arnaıy komıssııa sonshalyqty ashkózdikke jol bermeıdi. Onyń ústine, ólgen kıikter tekesi emes, ylǵı eshkisi men jańa týǵan quralaılary», – dedi. Názıra Járimbetova. Derek, sýret: egemen.kz.