Áripteske iltıpat

Alymdylyǵymen, adýyndylyǵymen ekiniń birine des bermeıtin áıel-analarymyzdyń qatarynan jýrnalıst Kúmisjan Baıjan da tabylady. Qashanda, áliptiń artyn kútip, baısaldylyǵymen bastaǵan jumysynan oń nátıje shyǵarý qalyptasqan ádeti. Bir mysal retinde aıtar bolsaq, ol jyr alyby Jambyl Jabaevtyń týǵan kúnin jyl saıyn joǵary deńgeıde atap ótýdi qalyptastyrýǵa ózindik eńbek sińire bildi. Almaty oblysy, Jambyl aýdandyq «Atameken» gazetin basqaryp otyrǵan jyldarynda osynaý ıgilikti iske uıytqy hám qozǵaýshy kúsh ıesi bolǵandyǵyn eshkim teriske shyǵara almasy haq. Respýblıkalyq bas basylym «Egemen Qazaqstan» gazetiniń Almaty oblysyndaǵy menshikti tilshisi qyzmetine kelgende quddy qosymsha tynysy ashylǵandaı kúni-túni tynbaı eńbek etti. Eń bastysy, jaýapkershilik júgin jete sezinip, barynsha shyǵarmashylyq izdeniste júrdi. Boıyndaǵy bir qasıeti – ót­kendi ekshep, tarazylaı alatyny der edik. О́mir qajettiligimen jasalǵan qadamdardy áste umytpaı jýrnalıster qaýymyna tán adal­dyqpen ar tazalyǵyn saqtaýǵa talpynyp qa­na qoımaı, oń nátıje shyǵara alatyndyǵy de­sek artyq aıtqandyq emes. Kepildik berer bir aýyz sózimen úlken laýazymdy tulǵany da ılan­dyrǵanyn et qulaǵymyz estigen. Taǵy bir qy­ry kómekke óte zárý bolǵan jandarmen tez uǵy­nysyp, demeı biletindigimen de kórine aldy. Sol qam­qorlyǵynyń nátıjesin kórgen jandar ara­myzda barshylyq. Júrgen jerinde jaqsy iz qal­dyra biletindigine bir dálel, onyń keshegi meıi­rim shýaǵyna toly kúnderin kórip, jumsaq jú­rek­ti jannyń jylýyn sezingen sińlileri tamsa­na aıtyp, úlken iltıpat tanytyp júrgenine kýámiz. Júreginiń túbindegi sóz marjanyn bir shýmaqqa syıǵyza bilgen Kúmisjan Baı­jannyń: «Unatamyn perishte únin qustardyń, Dál solardaı qalyqtaýǵa qushtarmyn. Uıa salyp balapanyn ósirgen, Qarlyǵashtaı oı-sózimdi ushtarmyn» degen óleń joldary osy oıymyzdy bekite túsedi. Elbasynyń Alǵys hatymen birneshe márte marapattalyp, «Egemen Qazaqstan» gazetiniń Almaty oblysyndaǵy menshikti tilshisi qyzmetin jeti jyl atqaryp, Mádenıet qaıratkeri, «Eńbek ardageri» jáne merekelik medaldardyń ıegeri bolyp, Almaty oblysy men Taldyqorǵan qalasynyń, Jambyl aýdanynyń Qurmetti azamaty atanǵan Kúmis­jan Baıjan jýrnalıstıka salasynda qyryq jyldan astam jemisti eńbek etti. Búginde ulyn uıaǵa, qyzyn qııaǵa qondyryp, qosaǵymen qosa aǵaryp sol eńbeginiń jemisin jep otyr. Bul da bir aqtalǵan úmittiń, oıǵa alǵannyń oryndalǵany ekeni anyq.  Nurbol ÁLDIBAEV, «Egemen Qazaqstan». Almaty oblysy, Jambyl aýdany.