Syrdaǵy sony serpilis

Qyzylorda oblysynyń ákimi Qyrymbek Kósherbaev «Egemen Qazaqstan» respýblıkalyq gazeti» aksıonerlik qoǵamynyń prezıdenti Saýytbek Abdrahmanovty qabyldady. Elbasymyzdyń «Syr – Alashtyń anasy» degen sózi barshaǵa belgili. Maǵjan aqynnyń «Kóp túrik enshi alysyp tarasqanda, Qazaqta qara shańyraq qalǵan joq pa?» deıtin jyr joldaryndaǵy orasan oqıǵalar Syr boıynda ótken. Túrki halyqtaryna ortaq uly oıshyl Qorqyt Ata beıitiniń osynda ekendigi de kóp jaıdy ańǵartady. Ár qazaqtyń Syr elinen jetetin jańalyqtarǵa qulaq túre júretini de sondyqtan. Shúkirshilik, sońǵy jyldarda Qyzylorda oblysynyń ómirinde aıtatyn da, jazatyn da, kórsetetin de jaqsy jańalyqtar kóbeıip keledi. Bas basylym basshysy S.Abdrahmanov oblys ákimi Qyrymbek Kósherbaevpen  áńgimeniń basynda Qyzylordanyń kelbeti kórkeıe túskenin, jeke sektordaǵy turǵyn úılerdiń aýmaǵy da, aıshyǵy da halyqtyń ál-aýqaty anaǵurlym artqanyn ańǵartatynyn razylyqpen aıtyp ótti. Oblys ákimi óńirdegi órkendi ózgerister bir jaǵynan ekonomıkany ártaraptandyrýdyń, ekinshi jaǵynan ınvestorlarmen jemisti jumystyń nátıjesi ekenine nazar aýdardy. Eýropa Qaıta qurý jáne Damý bankimen 75 mıllıard teńgege, Azııa Damý bankimen 171 mıllıard teńgege shart jasalyp, olardyń bári de ınfraqurylymdyq jobalarǵa baǵyttalyp otyr. «Jol tóselip, sý tartylyp, gaz jetkizilse boldy, qalǵan sharýa halyqtyń ózinen-aq artylmaıdy, adamǵa múmkindik berilgennen keıin-aq jeke qurylys toqtaýsyz damı beredi, onyń bári aınalyp kelgende qurylys materıaldarynyń ónerkásibine de, jurtty jumyspen qamtýǵa da, el turmysyn túzeýge de tikeleı áser etedi», dedi Qyrymbek Eleýuly. Gazet basshysy issaparǵa shyǵardyń aldynda tıisti oryndardan qajetti málimetter aldyrǵanyn, sonda sońǵy eki jarym jyldyń ishinde Qyzylorda oblysynyń bıýdjeti 2 ese óskenine tańdanǵanyn jasyrǵan joq. Iá, Syr óńirinde ekonomıkany ártaraptandyrý erekshe nátıje berýde. Mysaly, keıingi eki jarym jyl ishinde munda óńdeý ónerkásibiniń kólemi 76 paıyzǵa artqan, bul kórsetkish boıynsha Syr boıy el kóshin bastap keledi. Qurylys qarqyny tipti eren. Úı salý oblys boıynsha 3,5 ese ósken, al  Qyzylordanyń ózinde… 8 ese artqan! Mal basy da kóbeıip keledi. Bıyl Syr boıyndaǵy tórt túliktiń sany oblystyń 1990 jylǵy kórsetkishi deńgeıine teńesti. Al 1990 jyl – negizinen egin jáne mal sharýashylyǵymen aınalysatyn osy oblystyń Lenın ordenin alǵan jyly. Qyrymbek Kósherbaev oblys ekonomıkasynyń jańa baǵyttary bolyp tabylatyn ferroqorytpa zaýyty, shyny zaýyty, Shalqııadaǵy taý-ken zaýyty sııaqty iri kásiporyndardyń múmkindigi jóninde áńgimeledi. Rýhanı damý baǵytynda da irgeli ister atqarylýda. Aıtqandaı, osy kúnderi oblystyń Shıeli, Jalaǵash, Qarmaqshy aýdandaryn aralaǵan S.Abdrahmanov sáýlet óneriniń aıryqsha úlgisi bolyp tabylatyn Qorqyt Ata eskertkishi túbegeıli jańartylǵanyna razylyq bildirdi. Syr boıyndaǵy sony serpilis qaı salada da kelisti kórinip otyr. Halqynyń sany 675 myńnan ǵana asatyn oblysta eldiń bas gazetin jazylyp aldyrýshylardyń qatary keler jyly 22 myń danaǵa jetedi degen boljamnyń nyq senimmen aıtylǵany da sondyqtan. Erjan BAITILES, «Egemen Qazaqstan». Sýretti túsirgen Baǵdat ESJANOV. Qyzylorda oblysy.