«Oxy Textile» jip ıirý fabrıkasy jumysyn bastady
Shymkenttegi «Ońtústik» arnaıy ekonomıkalyq aımaǵyndaǵy «Oxy Textile» jip ıirý fabrıkasy qaıtadan iske qosyldy. Qaıtadan deýimizge sebep bar. Bul zaýyt osydan attaı bes jyl buryn dúrildep ashylǵan. Maqta shıkizaty qaıda deıtindeı emes, aq maqtanyń otany Maqtaaral aman bolsyn. Fabrıka quryltaıshysy da qarjydan qınalmaıtyndyǵyn kesip aıtqan. Toqymashylar da kóńildi-aq edi. Áıtse de «úıdegi kóńildi bazardaǵy naryq buzadynyń» keri keldi. 2008-2009 jyldardaǵy álemdik qarjy daǵdarysy men maqta baǵamyna degen turaqsyzdyq kúni erteń Qazaqstandaǵy eń myqty fabrıkanyń biri bolady dep otyrǵan kásiporynnyń jabylyp qalýyna ákelip soqty.
Oblystyq máslıhattyń depýtaty, belgili kásipker Ábilqasym Dosbolov Ońtústik Koreıadaǵy mal azyǵyn daıyndaıtyn iri kásiporyndardyń shópti Amerıkadan bastap biraz elderden satyp alatyndyǵyn aıtyp edi. Qurama jemge aınaldyryp eń iri mal bordaqylaý oryndaryn azyqtan taryqtyrmaı tabysqa shyǵyp otyr eken.
Al, Ońtústikte Amerıkadan arbalaıtyndaı emes, qudaıǵa shúkir, aq maqta jetedi. Lıverpýl maqta bırjasyndaǵy baǵa turaqsyzdyǵy bolmasa bir emes ondaǵan zaýyt, fabrıkanyń qalaı, qaıda paıdalanamyn dese de ketpenderi kún nuryna jarqyraǵan dıqandar aq altynnan taryqtyrmaıdy.
Bul joly «Oxy Textile»-ge «Baiterek Venture Fund» kómekke keldi.
907,5 mln.teńge kóleminde bólingen qarajat zaýyttyń esh kedergisiz jumys jasaýyn qamtamasyz etýi tıis. Mundaı kásiporyndy saýyqtyrý jańa jumys oryndaryn ashady. Onyń syrtynda bilikti mamandardyń elden ketpeýine, óńdiristi órkendetýge múmkindik beredi, dedi «Baiterek Venture Fund» AQ basqarma tóraǵasynyń orynbasary Nurjan Ábishev.
Bizde osyndaı jáne basqa da toqyma óndirisi kásiporyndarynyń qyzmet etýi úshin «Ońtústik» arnaıy ekonomıkalyq aımaǵynda tolyǵymen ınjenerlik ınfraqurylym jasalǵan. Búgingi tańda «Ońtústik» EEA-da 21,665 mlrd. teńgeni quraıtyn 8 joba iske asyp, 1445 jumys orny ashylǵan. Odan bólek, quny 114,7 mlrd. teńgeni quraıtyn 11 jobany iske asyrý jumystary júrgizilýde. Munda jalpy 7141 jumys orny ashylmaq. Sonyń ishinde 2015 jyly quny 4,664 mlrd. teńgeni jáne 1200 jumys orny ashylatyn 4 joba iske qosylady. «Oxy Textile» JShS fabrıkasyn saýyqtyrýdyń ár kezeńinde Ońtústik Qazaqstan oblysynyń ákimdigi tarapynan jan-jaqty qoldaý jasaldy. Toqyma klasteri bizdiń aımaqtyń birden-bir basym baǵyttary bolyp tabylady. Sonymen qatar, jumys jasaıtyn kásiporyn – bul bıýdjetke túsetin qosymsha salyq tólemderi, jańa jumys oryndary jáne oblysymyzdyń áleýmettik turaqtylyǵy, dep atap ótti Ońtústik Qazaqstan oblysy ákiminiń orynbasary Saparbek Tuıaqbaev.
«Báıterek» ulttyq basqarýshy holdıngi» AQ 2013 jyly Elbasynyń Jarlyǵymen dúnıege kelgen. Negizgi maqsaty ekonomıkany damytý men ártaraptandyrýǵa, ınvestısııa tartýǵa, klasterlerdi damytýǵa, enshiles uıymdarda korporatıvtik basqarý júıesin jetildirýge qoldaý kórsetetin holdıng Ońtústiktegi fabrıkaǵa birinshi ret qoldaý kórsetip otyrǵan joq.
«Oxy Textile»-diń basyna tóngen kún «Melanjdyń» quramyna kiretin eki fabrıkany da sansyratyp ketken. Sol maqta-mata óndirisinde daıyn ónimderdi shyǵaratyn eki fabrıkany da «Báıterek» Elbasynyń tapsyrmasymen iske qosyp ketken edi. «Oxy Textile» aıaǵyna nyq turǵannan keıin jylyna 6183 tonna daıyn ónim almaq nıette. Búginde fabrıkada toqsannan astam adam jumys jasap jatyr. Qýatyna tolyq engennen keıin 270 adamǵa jumys ornyn ashpaq. Sonymen, «Báıterektiń» saıa bolýynyń arqasynda taǵy bir kásiporyn qaıta sapqa qosyldy. Mundaǵy qondyrǵylar halyqaralyq standarttarǵa negizdelgen, ónimi de naryqtaǵy taıtalasqa laıyq. Qazirdiń ózinde eksport máselesinde kórshi Qytaımen kelissóz júrgizilýde.
Qytaı – alyp memleket. Maqta ónimine suranys úlken. Qajetterin ashar bolsa «Oxy Textile»-diń aıy ońynan týady deı berińiz. Al, kásiporyn toqtaǵanda úıinde amalsyz otyryp qalǵan toqymashylar toqyma stanoktaryna qaıta oraltqan Elbasyna raqmet aıtady. О́ndiris órkendese Qazaqstannyń eńsesi bıik, júzi jarqyn, azamattarynyń keleshekke degen senimi zor.
Baqtııar TAIJAN,
«Egemen Qazaqstan».
Ońtústik Qazaqstan oblysy.
