Soltústik Qazaqstanda iri qara maly brýsellezge shaldyqty

PETROPAVL. 24 mamyr. Qyzyljar aýdanyna qarasty Semıpolatnoe aýylynda 35 múıizdi iri qara malynan brýsellez taıaqshalary tabylýyna baılanysty karantın jarııalanyp, sút, et ónimderin satyp alýǵa tyıym salyndy. Bul týraly KTK telearnasy habarlady. Alaıda, mal ıeleri qosymsha saraptama jasaýdy talap etip, aýrý maldardy ótkizýden úzildi-kesildi bas tartyp otyr. «О́tken aptada mal dárigerleri aýrý sıyrdy alyp ketti. Endi buzaýyn da kúshtep almaqshy. Osynshama maldyń brýsellezge shaldyqqanyna senbeımiz. Munyń bári oıdan shyǵarylǵan jala. Kúdiktense, nege ekinshi ret qan almaıdy?», deıdi Petrovtar otbasy. Rassvet aýyldyq okrýginiń ákimi Qaısa Jańabekovtyń aıtýy boıynsha   alǵashqy tekserýde 180 bas maldyń 34-nen aýrý shyqqan. 20 mal etke ótkizilip, ár kılo et úshin 500 teńgeden ótemaqy tólengen.  Aıǵaı-shýdy ótemaqyny azsynyp júrgender kóterip júrgen kórinedi. Aýrý maldy jaıylymǵa shyǵarýǵa da tyıym salynǵan. Áıtpese 40 myń teńge mólsherinde aıyppul salynady. Maldan brýsellez taıaqshalary anyqtalysymen 15 kúnniń ishinde kózi joıylýy tıis. Aldyn alý sharalary jedel qarastyrylmasa, adamdarǵa da juǵyp, indetke aınalyp ketýi ǵajap emes. Aýyl turǵyndarynyń biri Álııa Álkına karantın jarııalanǵaly etti de, sútti de eshkim qabyldamaı jatqanyn,bala-shaǵa nápaqasyn tórt túlikten aıyryp otyrǵan turǵyndardyń kúnkórisi qıyndap ketkenin jylamsyraı jetkizdi. Mal dárigerleri aýrý maldardyń bári áketilgen soń taǵy da tekserý sharalaryn júrgizip, eger dert anyqtalmasa, karantındi alyp tastaýǵa ýáde berip otyr. Ázirge eki tarap bir-birin kinálaýmen júr. О́mir Esqalı. Derek: KTK telearnasy. Sýret: egemen.kz